Türkiyə Avro-2024-ə Gürcüstan üzərində qələbəylə başladı 

19 yaşlı Arda Gülər matçın ən yaxşı oyunçusu seçilib

İyunun 14-də Almaniyada startı verilən futbol üzrə Avropa Çempionatı davam edir. Çempionatın 5-ci günü (bu gün) Azərbaycan futbol azarkeşlərinin də maraqla izlədiyi bir oyun keçirilib. Söhbət F qrupunda yer alan Türkiyə millisinin Gürcüstan komandasına qarşı oyundan gedir. Dortmund şəhərindəki "Siqnal İdina Park" stadionunda baş tutan həmin oyunda Türkiyənin ay-ulduzlu yığması qalıb gəlib - 3:1 (ilk yarı 1:1). 

Matçda ilk qolu Mert Myuldyer (25-ci dəqiqə) vurub - 1:0. 32-ci dəqiqədə Gürcüstan millisinin oyunçusu Mikautadze bərabərlik qoluna imza atıb - 1:1.

Matçın ikinci yarısında türklər daha da fəal oynayıblar. Start heyətdə meydana çıxan 19 yaşlı Arda Gülər ("Real" Madrid) qarşılaşmanın 65-ci dəqiqəsində dəqiq zərbə ilə Türkiyə komandasına qələbə qazandıran qola imza atıb - 2:1. Qeyd edək ki, Avropa çempionatında debütünü qolla qeyd edən Arda Gülər matçın ən yaxşı oyunçusu seçilib.  79-cu dəqiqədə onu Yusif Yazıçı əvəzləyib. 

Matçda son nöqtəni isə Kərəm Aqturkoqlu (90+7) qoyub.

Bu gün F qrupunda keçiriləcək digər oyunda isə Portuqaliya Çexiya ilə üzləşir. Oyun davam edir.

Yeri gəlmişkən, Türkiyə millisi növbəti matçını iyunun 21-də Portuqaliyaya qarşı keçirəcək. Həmin gün qrupun digər matçında isə Çexiya ilə Gürcüstan üzləşəcək.

İNTİQAM Məmmədov