Azərbaycan millisi Çövkən üzrə dünya çempionatının qalibidir

İyunun 10-da Binə Atçılıq Mərkəzində 10 komandanın iştirakı Çövkən atçılıq idman növü üzrə startı verilən birinci dünya çempionatına bu gün üçüncü yer uğrunda və həlledici final oyunu ilə yekun vuruldu. Oyunlardan öncə mundialın təntənəli açılış mərasimi oldu. Mərasimdə DCX-nin rəqs ansamblı və eləcə də süvarilər gözəl kompozisiyalar nümayiş etdirdilər.Bunun ardından isə Özbəkistan və Nigeriya komandası bürünc medal uğrunda mübarizə aparmaq üçün meydana çıxdılar. Görüşün əsas hissəsi 1:1 hesabla bitdiyi üçün komandalar 8 (4+4) dəqiqəlik əlavə vaxtda mübarizəni davam etdirdilər. Yenə də qalib aşkar edilmədiyi üçün komandalar penaltilər seriyasına başladılar. Penaltı zərbələrində daha dəqiq olan Nigeriya 3:1 hesabla qalib gələrək mundialın bürünc medalını qazandı.

Bunun ardından isə mundialın qalibini müəyyənləşdirmək üçün ev sahibi olan Azərbaycan millisi ilə Mərakeş komandası meydana çıxdı. Gərgin mübarizə şəraitində keçən görüş Azərbaycan komandasının 2:0 hesablı qələbəsi ilə başa çatdı. Yiqmamizin heyətində hər iki qolu komandamızın kapitanı Elçin Cəlilov vurdu (5-ci dəqiqədə penaltı, 12-ci dəqiqə). Bununla da Azərbaycan komandası ev sahibliyi etdiyi birinci dünya çempionatının qalibi oldu.

Qeyd: Mundialda 10 komanda iki qrupda mübarizə aparıb. Reqlamentə görə, qrup liderləri birbaşa finala çıxmaqla çempionluq, qrup ikinciləri isə mundialın bürünc medalı uğrunda mübarizə aparıb.

İNTİQAM Məmmədov