Azərbaycan millisi AK-da Ermənistan komandasını darmadağın edib 

Bu gün Priştinede (Kosovo) 3x3 basketbolu üzrə kişi və qadınlar arasında Avropa Kubokunun seçmə qrup oyunlarına start verilib. Turnirin B qrupunda yer alan Azərbaycan millisi ilk matçını ermənilərə qarşı keçirib. Görüş komandamızın darmadağın hesablı qələbəsi ilə başa çatıb - 22:9. Heyətində Cordan Devis, Amil Həmzəyev, Cəbrayıl Əkbərov və Endar Poladxanlinin yer aldığı yığmamız bunun ardından Kosovonu 14:10 hesabla məğlubiyyətə uğradıb. Komandamızı günün sonunadək Kipr və Albaniya ilə görüş gözləyir.

Turnirin digər qrupunda isə Lüksemburq, Malta, Andorra və İrlandiya millisi yer alıb. 

Bu gün eyni məkanda qadınların da analoji turniri keçirilir. Burada isə heyəti Dina Ulyanova, Tatyana Deniskina, Aleksandra Mollenxauer və Mersedes Uolkerden ibarət olan qadın millimiz B qrupunda Malta və Lüksemburq komandasiyla qarşılaşacaq. Qadınların yarışında diğər qrupda isə İrlandiya, Andorra, Kosovo və Kipr millisi yer alıb. Bu gün turnirdə qrup oyunları keçiriləcək. Sabah isə pley-off oyunları və final matçı ilə turnirə yekun vurulacaq.

Reqlamentə görə, həm kişilərin, həm də qadınların turnirində qalib adını qazanan komanda 22-25 avqust günlərində Vyanada (Avstriya) keçiriləcək Avropa Kubokunun həlledici final yarısına vəsiqə qazanacaq.

İNTİQAM Məmmədov