Hüceyrə yaşlanmasını geri qaytarmağın yolu tapılıb

Ürək-sağlam davranışlar hüceyrə yaşlanmasını geri qaytarmağa kömək edir.

Bunu "JACC" jurnalında dərc olunan araşdırma göstərib. 

Müxtəlif genlərin fəaliyyəti həyat boyu dəyişə bilər. DNT-nin xüsusi kimyəvi modifikasiyası olan metil işarələri buna cavabdehdir. Bir insanın bioloji yaşını təyin etmək üçün metilasiya nümunələri istifadə olunur. Yeni bir araşdırmada həkimlər DNT metilasiyası və ürək-damar sağlamlığı arasındakı əlaqəni qiymətləndirmək üçün "Life's Essential" 8 sorğusundan istifadə etdilər.

"Life's Essential" 8 ürək-damar riskini 0 ilə 100 bal arasında qiymətləndirmək üçün bir şkaladır. Bu alət dörd davranış göstəricisinin (pəhriz, fiziki fəaliyyət, gecə yuxu saatları və siqaret çəkmə vəziyyəti) və dörd klinik göstəricinin (bədən kütləsi indeksi, xolesterin və qan şəkərinin səviyyəsi və qan təzyiqi) birləşməsini nəzərə alır.

İştirakçılar 11-14 il ərzində izləndi. "Life's Essential" 8 şkalası üzrə hər 13 bal ürək-damar xəstəlikləri riskini təxminən 35% azaldır. Təhlil göstərdi ki, bu nəticənin 20%-i DNT metilasiyası ilə bağlı olub, yəni həyat tərzi faktorları gen aktivliyinə təsir edib. Daha yüksək genetik riski olan iştirakçılar üçün DNT metilasiyasının ürək sağlamlığına töhfəsi 40% təşkil etmişdir.

Alimlər vurğuladılar ki, həyat tərzinin ürək-damar sağlamlığına təsiri çoxdan məlumdur. Yeni iş gen aktivliyinin risk faktorları və ürək-damar xəstəlikləri arasında vasitəçilik edə biləcəyini göstərir.