"Ölkə sərhədlərinin sanitariya mühafizəsində qurumlararası koordinasiyanın aspektləri” mövzusunda Dəyirmi masa keçirilib

Azərbaycan Respublikası Dövlət Gömrük Komitəsi Tibbi Xidmət İdarəsinin Sanitar-Karantin Xidmətinin təşkilatçılığı ilə 24 may 2024-cü il tarixində Ümumdünya Gömrük Təşkilatının (ÜGT) Potensialın Gücləndirilməsi üzrə Bakı şəhərində yerləşən Avropa Regional Ofisində “Ölkə sərhədlərinin sanitariya mühafizəsində qurumlararası koordinasiyanın aspektləri” mövzusunda Dəyirmi masa keçirilib. 
Açılış mərasimində Dövlət Gömrük Komitəsi sədrinin müavini Cavad Qasımov,  Dövlət Gömrük Komitəsi Tibbi Xidmət İdarəsinin rəisi Ceyhun Məmmədov, Səhiyyə nazirinin müavini Nadir Zeynalov, Azərbaycan Respublikası Qida Təhlükəsizliyi Agentliyinin sədr müavini Əziz Şərifov və TƏBİB-in icraçı direktorunun müavini Anar İsrafilov çıxış edərək tədbirin əhəmiyyətindən bəhs ediblər. 
COVİD-19 pandemiyası dövründə dövlətimiz tərəfindən insanların sağlamlığının qorunması, virusun yayılmasının qarşısının alınması, ticarət-təchizat zəncirinin davamlılığının təmin edilməsi məqsədilə həyata keçirilən tədbirlərdən, qazanılan müsbət təcrübədən bəhs olunub.
Gömrük-sərhəd keçid məntəqələrində sanitar-epidemioloji nəzarətin səmərəli təşkili, bu sahəyə cavabdeh olan dövlət qurumları ilə əməkdaşlığın gücləndirilməsi, malların və nəqliyyat vasitələrinin təhlükəsiz şəkildə hərəkətinin təmin olunması istiqamətində mühüm addımların atıldığı diqqətə çatdırılıb.
O da qeyd olunub ki, hazırda ölkə sərhədlərinin sanitariya mühafizəsinin təşkilində iştirak edən qurumların əməkdaşlığının genişləndirilməsi, nəzarətin gücləndirilməsi və bu sahədə aparılan işlərin təkmilləşdirilməsi diqqət mərkəzindədir.
Dövlət Gömrük Komitəsi Tibbi Xidmət İdarəsinin rəis müavini Şahlar Mirqasımın moderatorluğu ilə keçirilən tədbirdə Dövlət Gömrük Komitəsi Tibbi Xidmət İdarəsinin Sanitar-Karantin Xidmətinin rəisi Surxay Məmmədov “Ölkə sərhədlərinin sanitariya mühafizəsində qurumlararası koordinasiyanın perspektivləri”, Səhiyyə Nazirliyinin İctimai Səhiyyə və Xəstəliklərə Nəzarət şöbəsinin müdiri Nəzifə Mürsəlova “Azərbaycan Respublikasında yoluxucu xəstəliklərlə mübarizədə Beynəlxalq Tibbi Sanitariya Qaydalarının (2005) tətbiqi”, TƏBİB-in Yoluxucu xəstəliklər və infeksion nəzarətin təşkili şöbəsinin müdiri Nəzrin Mustafayeva “Ölkə sərhədlərinin sanitar mühafizəsində TƏBİB-in rolu və koordinasiya məsələləri”, Azərbaycan Respublikası Qida Təhlükəsizliyi Agentliyinin İdxal-ixrac şöbəsinin müdiri Əkbər Əliyev “Sərhəddə qida təhlükəsizliyinin təmin edilməsi sahəsində beynəlxalq təcrübə, ölkəmizdə bu sahədə aparılan işlər, əldə edilmiş nailiyyətlər və perspektivlər”, Ümumdünya Səhiyyə Təşkilatının Azərbaycan nümayəndilinin əməkdaşı Cəvahir Süleymanova “Beynəlxalq Tibbi Sanitariya Qaydaları (2005) çərçivəsində ölkəyə giriş nöqtələrində Ümumdünya Səhiyyə Təşkilatı və ölkədaxili qurumların əməkdaşlığının koordinasiyası” mövzusunda məruzələr ediblər.  Daha sonra tədbir iştirakçıları mövzularla bağlı fikir mübadiləsi aparıblar.