Ölkəmizi qürurla təmsil edən musiqiçimiz Əli Məlikovun yaradıcılıq yolu

Müasir dövrümüzdə respublikamızda baş verən bütün yenilikləri, vətənimizin oğullarının qəhrəmanlıqlarını, mədəniyyət və incəsənətimizin inkişafını, ölkəmizin çiçəklənməsini dünyanın dörd bir yanından duymaq olur. Vətənimizi xarici ölkələrdə qürurla təmsil edən müxtəlif yaş kateqoriyalarında olan nümayəndələr, sənətkarlar, rəssamlar, musiqiçilər və s. bu öhdəliyi layiqincə yerinə yetirməkdədirlər. Azərbaycan Respublikasının mədəniyyətini, incəsənətini dünyada təmsil edənlərdən biri də istedadlı musiqiçi Əli Məlikovdur.
Məlikov Əli Tahir oğlu 26 aprel 1987-ci il tarixində Bakı şəhərində  anadan olmuşdur. Kiçik yaşlarından valideynlərinin işi ilə əlaqədar olaraq Finlandiyaya köçən Əli orta məktəb təsilini elə həmin ölkədə almışdır. Məktəbi bitirdikdən sonra 2004-cü ildə o, Kommersiya İnstitutuna daxil olmuşdur. 2008-ci ildə təhsil aldığı institutdan məzun olur.
 Əli Məlikovun musiqiyə bağlılığı və maraq duyması məncə təsadüfi deyildi. O, musiqiçi ailəsində doğulmuş, boya-başa çatmışdı. Atası tanınmış musiqiçi olan gənc istedad elə kiçik yaşlarından musiqiyə meyil edərək, atasından nağara dərsləri almağa başlayır. Əli ilk öncə İbrahim Əbilov adına Mədəniyyət Mərkəzində, daha sonra isə bir çox dərnəklərdə dərs alaraq böyük təcrübə toplamışdır. O, məşhur nağara ustadı Şirzad Həsənovdan 5 il nağara dərsi almış,musiqi notlarının təməlini ustalıqla mənimsəmişdir.
Musiqiçimizin 2006-cı idən başlayaraq diasporla geniş əlaqələri yaranır. O, ölkə xaricində azəbaycanlı kimi müxtəlif tədbir və konsert proqramlarında vətənimizi uğurla təmsil edir. 2019-cu il 27 oktyabr tarixində Finlandiyada təşkil olunmuş Azərbaycan Mədəniyyət günlərində tanınmış musiqiçilər, Beynəlxalq Muğam Mərkəzinin solisti, Azərbaycan Respublikasının Prezident təqaüdçüsü, tar ifaçısı Rövşən Qurbanov və muğam ifaçısı Rəvanə Qurbanova ilə birlikdə eyni səhnəni paylaşaraq çıxış etmişdir.
Öz musiqili çıxışlarını Finlandiyada davam etdirən Əli Məlikov 2022-ci ildə Azərbaycan Respublikasının Əməkdar Artisti, Beynəlxalq Muğam Mərkəzinin rəhbəri  Sahib Paşazadə ilə Zəfər günümüzə həsr olunmuş konsert proqramında eyni səhnəni paylaşmışdır. Sözügedən tədbirdə fərqli ölkələrin diaspor sədrləri iştirak etmişdir.
Müxtəlif ökələrdə çıxışları olan istedadlı musiqiçimiz diaspor sədri Ramin Mehdiyevin dəvəti ilə 2023-cü ildə Ulu Öndər Heydər Əliyevin 100 illik yubileyi ilə əlaqədar olaraq Norveçdə baş tutacaq tədbirə qatılır. Təşkil olunmuş konsertdə bir çox tanınmış sənətkarlar möhtəşəm yubiley gecəsi keçirirlər. Konsertdə nağara ifaçısı kimi çıxış edən Əli Məlikov öz musiqili ifası ilə konsert iştirakçılarını heyran qoymağı bacarır. O, 2006-cı ildən bu günə kimi Finlandiyada diasporla birgə çalışmış, müxtəlif işlər ərsəyə gətirmişdir. Vətəni doğma Azərbaycanın adı ilə, milli musiqimizlə bağlı böyük qürur və əvəzsiz sevgi ilə ölkəmizi təmsil etmişdir.

Ziyarət Cabarova Qəhrəmanova
Azərbaycan Dövlət Rəsm Qalereyasının Böyük Elmi İşçisi, 
Azərbaycan Rəssamlar İttifaqının Gənc Sənətşünaslar bölməsi üzrə Prezident təqaüdçüsü, Sənətşünas