RUHUN RUHLAR TƏMƏLİ  –  Yeni şeirlər

"AzPress" İnformasiya Agentliyinin "AZpressTİMES.info" xəbər saytı Arif Fərzəlinin yeni şeirlərini təqdim edir.

Arif Fərzəli (Fərzəliyev Arif Xudakərim oğlu) 1956-cı ildə Masallı rayonunun  Xırmandalı kəndində ziyalı ailəsində anadan olub.

1978-ci ildə  Azərbaycan Dövlət  Universitetinin (indiki BDU-nun) kimya fakültəsini, 1991-ci ildə Moskva şəhərində M.Qorki adına Ədəbiyyat İnstitutunun poeziya şöbəsini bitirib.

Yarım əsrə yaxındır ki, bədii yaradıcılıqla məşğuldur. Şeirləri, publisistik yazıları “Azərbaycan”, “Literaturnıy Azərbaydjan”, “Ulduz”, “Gənclik”,  “Karvan”, “Söz” jurnallarında, almanaxlarda, onlarca qəzetdə çap edilib. 

“Toxuma həsrət torpaq”, “Sizin dünya”, “Ömür yarımçıq qalmır”, “Yağışa düşən qərib”, “Tarix kitabı” və “Ömürdən iki yarpaq” kitablarının müəllifi, Azərbaycan Yazıçılar  Birliyinin üzvüdür.

Güllə

İlk hecası – gül,

amma şakəri

güldürməkdən tamam uzaq –

insanı öldürüb,

insan ağlatmaq...

İlk hecası – gül,

amma nəfəsində

gül yox,

barıt qoxusu var...

Torpaq yerinə,

dibçək əvəzinə,

sinələrdə

qırmızı “gül”lər açdırar...

Ruhun ruhlar təməli 

General-mayor Polad Həşimovun xatirəsinə

Uca dağ başında qalanmış

gur tonqala döndü,

Oğuz elinin

hər tərəfindən göründü

şəhidliyin.

Bu ulu çağırış

hamımızı silkələdi,

köklədi

əsir düşmüş

yurd yerlərimizin xilasına,

düşməni qovub,

öz üçrəngli bayrağımızı

sancdıq Şuşa qalasına.

Ruhun ruhlar təməli –

ruhumla sən də vardın

sıramızda o gün,

neçə-neçə şəhidin

döş cibindən çıxdı

qana bələnmiş şəklin...

Oğuz elinin

hər tərəfindən göründü,

hər tərəfində

dastana döndü

şəhidliyin…

Vüsalı hicrandan öndə 

Qapısından şəhid girə,

O həyət çökməzmi ola?!.

Ahənrüba tək hamını 

Özünə çəkməzmi ola?!.

Enib gələr quşlar belə,

Bir oxşama başlar belə.

Muma dönüb, daşlar belə

Göz yaşı tökməzmi ola?!.

Ucalıq var ölümündə,

Vüsalı hicrandan öndə.

Şəhid elə ölümün də 

Dizini bükməzmi ola?!.

Qürur qoymaz ana sına,

Yenilməz dərd - bəlasına.

Qəlbində öz balasına 

Bir qala tikməzmi ola?!.

Ey söz

Dostum Seyfəddin Əliyev üçün

Ey kökü, mayası, ruhu, ahəngi

Torpaqdan, atəşdən, sudan, havadan!

Nadanlar dilində qərib, didərgin,

Ariflər dilində yeri abadan!

Füzuli vəsfində məqamın – yerin

İnsandan o yana, Allahdan bəri,

Bəs indi mən sənə nə qiymət verim

Getməsin irəli, qalmasın geri?..

Ey bəzən bir anın bəhəri – barı,

Bəzən gecələrnən çəkilən yuxum!

Adicə qələmlə qəlblərə sarı

İllərin altından atdığın lağım!

Mən söz yazmamışam, söz yaşamışam,

Varlığın yoğrulub mehrindən sənin.

Bir ömür ələknən su daşımışam,

Çıxa bilməmişəm sehrindən sənin.

Ey kökü, mayası, ruhu, ahəngi

Torpaqdan, atəşdən, sudan, havadan!

Nadanlar dilində qərib, didərgin,

Ariflər dilində yeri abadan!