UNFPA-nın “Qadınlar Diqqət Mərkəzində” layihəsi çərçivəsində 4 regionu əhatə edən maarifləndirmə kampaniyası yekunlaşıb

BMT-nin Əhali Fondunun (UNFPA) gender əsaslı zorakılığa (GƏZ) məruz qalmış qadın və qızların mövcud müdafiə və dəstək mexanizmlərinə dair məlumatlandırılması məqsədilə həyata keçirdiyi 8 Mart - Beynəlxalq Qadınlar Gününə həsr olunmuş maarifləndirmə kampaniyası başa çatıb. Əsas məqsədi GƏZ və məişət zorakılığına dair ictimaiyyətin maarifləndirilməsi prosesinə dəstək olaraq mövcud mübarizə imkanlarını işıqlandırmaq olan kampaniyanın hədəf kütləsi psixoloqlar, hüquqşünaslar, sosial işçilər, müəllimlər, jurnalistlər və fəal vətəndaşlardan ibarət olub. Ümumilikdə 240 nəfərə yaxın şəxsin iştirakı ilə ölkənin 4 regionunda - Bakı, Sumqayıt, Bərdə və Gəncədə baş tutan 2 günlük təlim sessiyalarında gender ekspertlər Məryəm Məcidova və Günel Mehdiyeva tərəfindən GƏZ-lə mübarizədə icmanın rolu, zorakılıq hallarının davamlılığına təkan verən stereotiplər və yanaşmalar, vəkillər Rövşanə Rəhimli, Sərdar Zeynalov, Natiq Əliyev və Fariz Namazlı tərəfindən isə məişət zorakılığı ilə mübarizədə hüquqi mexanizmlər, real məişət zorakılığı keyslərinin praktikada həlli, vətəndaşların bu mübarizədə öhdəlikləri və imkanları kimi mövzular işıqlandırılıb. Təlimlərlə yanaşı, kampaniya ərzində sosial şəbəkələrdə də maarifləndirmə aparılıb. Belə ki, GƏZ-lə bağlı geniş yayılmış miflər, mühafizə orderi üçün müraciət qaydaları, GƏZ-lə mübarizə sahəsində fəaliyyət göstərən dəstək xətləri və s. mövzularda məzmunlar hazırlanaraq sosial şəbəkələr vasitəsilə paylaşılıb. Qeyd etmək lazımdır ki, kampaniya Yaponiyanın "Takeda Pharmaceuticals Company Limited" əczaçılıq şirkətinin maliyyə dəstəyi ilə BMT-nin Əhali Fondunun həyata keçirdiyi "Qadınlar diqqət mərkəzində: qadınlara qarşı zorakılıq pandemiyası ilə mübarizə" proqramı çərçivəsində “Gender Hub Azerbaijan” tərəfindən icra olunur.