Hümbət Quliyev: 

İnsanın özünü zorlaması haqqında

(esse)

Yaradan insanın nəinki ətraf mühitə qarşı, hətta özünə qarşı aqressiv olacağını nəzərə alıb onun özünü, özundən qorumalı olan mexanizm -təhtəlşüur yaradıb.

Məsələn, barmağınızla öz göz bəbəyinizə toxunmaq istəsəniz, iradənizin əksinə olaraq göz qapaqlarınız örtüləcək və siz məqsədinizə çatmayacaqsınız.

Təhtəlşüurumuz daxilimizi də gözümüz kimi qoruyur.

Bunu mədənin timsalında göstərim. Ağız vasitəsilə mədəmizə nə göndərməyimiz bizdən asılıdır. Tutaq ki, siz mütəmadi olaraq lazım olandan artıq yeməklə mədənizi doldurursunuz. Mədə əziyyət çəkdiyindən təhtəlşüur işə qoşulur. O, mədənizi qazla doldurub toxluq hissi yaradır ki, çox yeməyəsiniz.

Siz qaz əleyhinə dərman içib çox yeməkdə davam edirsiniz.

Bu dəfə təhtəlşüur sizdə qastrit( mədə divarının yüngül iltihabı) yaradır ki, yemək sizdə narahatçılıq yaratsın və siz az yeyəsiniz. Gedirsiniz həkimə və pul müqabilində müalicə alırsınız. Və bir az özünüzü yaxşı hiss edən kimi doğma mədəyə qarşı qəsdi davam edirsiniz. Təhtəlşüur siz tərəfdən mədəyə zorun davam etdiyini görüb xüsusi mexanizmlər vasitəsilə( paradontoz,karies) dişlərinizi sıradan çıxarır ki, qədərinizi keçməyəsiniz.

Siz gedirsiniz diş həkiminə və xarab olmuş dişlərin əvəzinə metaldan, keramikadan bərk dişlər düzəltdirirsiniz.

Yeni dişlərlə də mədəyə hücumu daha da artırırsınız. Təhtəlşüur bu dəfə sizə “qırmızı kart” olaraq mədə yarası-

" yazva" verir. Burda artıq cərrah peyda olub deyir ki, kəsək.

Çünki həkimlər ən böyük pulları xəstədən “kəsmək” yolu ilə ala bilirlər. Təəssüf ki, həkimlər təhtəlşüur tərəfdə, yəni xəstə tərəfdə deyil, pul müqabilində çox vaxt xəstəliyin tərəfində olurlar.

Iap əvvəldən insana deyilsə ki, az ye, pəhriz saxla, təhtəlşüur işə qoşulmazdı və hər şey yaxşı olardı.

Bütün dietologiyanın, pəhrizin məğzi bizim bir atalar sözündə ifadə olunub; " cox yemək insanı az yeməkdən də qoyar!"

Mən təkcə mədənin timsalında təhtəlşüurun necə işlədiyini göstərdim. Bunu bütün orqanların timsalında edə bilərəm. Kim fikirləşir ki, orqanizm mənimdir, nə istəsəm edə bilərəm, böyük səhv edir! Bizim Yaradan tərəfindən qoyulmuş " qoruyucumuz" - təhtəlşüurumuz var.

Nəfsə hakim olmaq prinsipinin arxasında insanın öz təhtəlşüuru ilə əməkdaşlığı, dostluğu nəzərdə tutulur. Sən öz bədənini zorlamayacaqsan, təhtəlşüur da sənə mərhəmətli olacaq.

Yaşasın insanın öz təhtəlşüuru ilə dostluğu.

Hümbət Quliyev.

" Statusman" kitabından.