Hümbət Quliyev: 

Buludlar haqqında

(esse)

Buludlara baxmısınız yəqin ki, qara və ya ağ olurlar. Qaralar su ilə dolmuşlardır. Yağışla boşalıb ağappaq olurlar. Bu bir bulud həyatıdır; dolub, boşalmaq.

İnsanlar da bulud kimi həyat enerjisi ilə, yaradıcılıq enerjisi ilə dolur, və mütləq boşalmalıdırlar. İnsanlar da eynən buludlar kimi, dolanda qaralırlar: Narahat olurlar, qəmli, qüssəli, kədərli gəzirlər. Belə insanlar həyat enerjilərini boşalda bilirlərsə "ağarırlar"- çöhrələri açılır, sifətləri gülür, sevinirlər…

İnsanlar öz həyat, yaradıcı enerjilərini müxtəlif cür boşaldırlar; kimisi şeirlə, kimisi musiqi ilə, kimisi rəsm çəkməklə.

Bu boşalmalar ləzzətlə müşahidə olunur, yaradıcılıq ləzzəti ilə. Bu əsl insan ləzzətdir. Məhz bu ləzzət ağıllı insanlar üçün digər ləzzətlərin fövqündə dayanır. Bu ləzzəti duyan insanlar təkrar- təkrar bu ləzzəti duymaq istəyir. Məhz bu səbəbdən onlar davamlı yaratmaq istəyirlər. Bu ilahi ləzzəti sevimli sənət və peşə ilə də almaq olur. Öz

“ boşalmaq” üsullarını tapmış insanlar xoşbəxtdirlər. Digər narkotik ləzzətlərdən fərqli olaraq bu üsul insan orqanizminə sağlamlaşdırıcı təsir göstərir və belə insanlar uzunömürlü olurlar.

Təəssüf ki, bəzi insanlar öz "boşalmaq" üsullarını tapa bilməyiblər. Bu " qara" insanlar ətrafımızda da az deyil. Bu insanlar asan sezilir. Adətən hər şeydən narazı, qeybətcil, deyingən, bədbin olurlar. Bunlar adətən öz izafi enerjilərini konfliktlərlə çıxartmağa meyillidirlər. Bu onların da, ətrafdakıların da həyatını çətinləşdirir, bəzən də, dözülməz edir.

Belə insanlara həkim məsləhətim: Baxın nə ilə məşğul olmaqdan xoşhallanırsınız? Hansı fəaliyyət növü ürəyinizcədir? Bu bənnalıqdan tutmuş müəllimliyə, bağbanlıqdan tutmuş dərziliyə qədər ola bilir. Sevimli fəaliyyətiniz pul, gəlir də gətirirsə, çox yaxşı. Bilməlisiniz ki, üsullar yüzlərlədir, əsas sizin seçiminizdir.

Sadəcə, öz kilidinizə öz açarınızı tapmalısınız. Mütləq arayıb tapın, çünki həmin açar sizin həm də xoşbəxtlik qapınızın açarıdır.

Xoşbəxt olun, bu sizdən, yalnız özünüzdən asılı olan işdir.

Hümbət Həsənoğlu