Gəncədən əməkdaşlıq mesajı

Milli maraqlar naminə birlik və həmrəylik

2026-cı il noyabrın 5–6-da Gəncədə keçirilən Azərbaycan Qeyri-Hökumət Təşkilatlarının IV Əməkdaşlıq Forumu vətəndaş cəmiyyətinin inkişafı, dövlət-QHT münasibətlərinin möhkəmləndirilməsi və milli maraqların müdafiəsində ictimai institutların rolunun artırılması baxımından mühüm hadisə olub. Bakı, Zəngilan və Xankəndidən sonra Gəncədə təşkil olunan forum yüzlərlə QHT nümayəndəsini ortaq məqsədlər ətrafında bir araya gətirib.
Forum iştirakçıları əvvəlcə Ümummilli lider Heydər Əliyevin abidəsini, Nizami Gəncəvinin məqbərəsini və Vətən müharibəsi zamanı həlak olmuş Gəncə sakinlərinin xatirəsinə ucaldılmış Memorial Kompleksi ziyarət ediblər.
Gəncə Dövlət Filarmoniyasında nümayiş etdirilən “Dirçəliş” adlı sərgidə isə Qarabağ və Şərqi Zəngəzurda aparılan quruculuq işləri, tarixi abidələr və azad edilmiş ərazilərin yeni siması sənət nümunələri vasitəsilə təqdim olunub.
Forumun açılış mərasimindən sonra “QHT-lərin sosial media, rəqəmsallaşma və süni intellekt bacarıqları”, “Azərbaycan QHT-ləri milli maraqların keşiyində” və “WUF13 irsi QHT təşəbbüslərində” mövzularında panel müzakirələri keçirilib. Müzakirələrdə vətəndaş cəmiyyətinin müasir çağırışlara uyğunlaşması, informasiya təhlükəsizliyi, ictimai diplomatiya və beynəlxalq əməkdaşlıq məsələləri diqqət mərkəzində olub.
“Azərbaycan QHT-ləri milli maraqların keşiyində” panelində Birliyimizin sədri Lalə Sərdarlı “Qərbi Azərbaycanın mədəni irsinin beynəlxalq tanıdılmasında vətəndaş cəmiyyətinin rolu və imkanları” mövzusunda çıxış edib. O, mədəni irsin tanıdılmasında elmi araşdırmaların, yaradıcı fəaliyyətin, maarifləndirmənin və beynəlxalq əməkdaşlığın vacibliyini vurğulayıb. Birliyin İstanbul, Almaniya və Vaşinqtonda təşkil etdiyi təqdimatlar, “Dərələyəzim Vəhdətdə”, “Urud abidələri”, “Turan Yolu – Zəngəzurum” kolleksiyaları bu fəaliyyətin nümunələri kimi diqqətə çatdırılıb. Sərdar Sandıq Mücrü Ocağının fəaliyyəti də milli irsin müasir sənət və texnologiyalarla əlaqələndirilməsi baxımından təqdim olunub.
Çıxışda qeyd edilib ki, müasir dövrdə milli maraqların müdafiəsi yalnız ərazi sərhədləri ilə məhdudlaşmır. İnformasiya məkanı, tarixi yaddaş və gənc nəslin dünyagörüşü də milli təhlükəsizliyin mühüm tərkib hissələridir. Bu baxımdan QHT-lərin maarifləndirmə, etibarlı məlumatların yayılması və milli-mədəni dəyərlərin təbliği istiqamətində fəaliyyəti xüsusi əhəmiyyət daşıyır.
JSİD – Jurnalist Sənətkarlığının İnkişafına Dəstək İctimai Birliyinin sədri Günel Gözəlova forumu “mükəmməl əməkdaşlıq layihəsi” adlandıraraq QHT-lər arasında institusional əlaqələrin, təcrübə və resurs mübadiləsinin əhəmiyyətini diqqətə çatdırıb. Onun fikrincə, forumların səmərəliliyi yalnız müzakirələrlə deyil, səsləndirilən təkliflərin konkret layihələrə və real nəticələrə çevrilməsi ilə ölçülməlidir.
Tədbirin mühüm məqamlarından biri də forum iştirakçılarının Azərbaycan Respublikasının Prezidenti İlham Əliyevə ünvanladıqları müraciət olub. Sənəddə milli maraqların qorunmasına, dövlətçilik prinsiplərinə və ölkənin inkişafına vətəndaş cəmiyyətinin dəstəyi ifadə edilib.
İşgüzar müzakirələrlə yanaşı, iştirakçılar üçün futbol proqramı, Gəncə Dövlət Simfonik Orkestrinin konserti və “Grand Teatr”da ziyafət təşkil olunub. Beləliklə, forum həm peşəkar fikir mübadiləsi, həm də yeni əməkdaşlıq əlaqələrinin qurulması baxımından zəngin proqramla yadda qalıb.
Gəncə Forumu bir daha göstərib ki, vətəndaş cəmiyyətinin gücü təşkilatların ayrı-ayrılıqda fəaliyyətində deyil, ortaq məqsədlər ətrafında birləşmək bacarığındadır. İndi əsas məsələ forumda yaranan təşəbbüsləri davamlı tərəfdaşlıqlara və konkret nəticələrə çevirməkdir. Çünki milli maraqların müdafiəsi, tarixi yaddaşın qorunması və Azərbaycanın beynəlxalq miqyasda layiqli təmsil olunması dövlətlə vətəndaş cəmiyyətinin birgə səylərini tələb edir.

Nərgiz MUXTAROVA,
Masallıda Qadınalrın Sosial İnkişafına Dəstək İctimai Birliyinin sədri