Ronaldo Braziliyanın Dünya Kubokundan çıxmasından sonra Ançelottini tənqid etdi

Braziliyanın baş məşqçisi Karlo Ançelotti komandanın 1/8 finalda Dünya Kubokundan çıxmasında ilk növbədə günahkardır.

Bu fikri ikiqat Dünya Kuboku çempionu Ronaldo bildirib.

Braziliya Norveçə 2-1 hesabı ilə uduzub.

"Karlo Ançelotti futbol tarixinin ən böyük məşqçilərindən biridir, amma bu gecə (Norveçlə oyun zamanı - red.) çoxlu səhvlər edib. Hələ də Joao Pedronun ("Çelsi"nin hücumçusu - red.) Dünya Kuboku heyətində niyə olmadığını başa düşmürəm. Onun müstəsna bir mövsümü var, yaxşı formadadır və Braziliyaya fərqli bir şey təklif edə biləcək hücumçu lazım idi", - deyə Ronaldo bildirib.

"Onda gəlin Hendrikə baxaq. Hər dəfə meydana çıxanda enerji, aqressivlik və gözlənilməzlik nümayiş etdirirdi. Bununla belə, o, Dünya Kubokunun çox hissəsini ehtiyat oyunçular skamyasında keçirib", - deyə o əlavə edib. İkiqat Dünya Kuboku çempionu hesab edir ki, "Real Madrid"in hücumçusu Vinisius da Braziliyanın turnirdən erkən çıxmasında məsuliyyət daşımalıdır. Ronaldo sonda bildirib: "Hamımız onun nə qədər istedadlı olduğunu bilirik, amma bu Dünya Kuboku onun üçün yaxşı keçmədi. O, heç vaxt klub futbolunda gördüyümüz oyunçunu göstərmədi. Norveç qalib gəlməyə layiq idi, amma Braziliya matç başlamazdan əvvəl səhvlər edərək rəqiblərinə kömək etdi".

Qeyd etmək lazımdır ki, Braziliya 36 ildən sonra ilk dəfə Dünya Kubokunun dörddəbir finalına çıxa bilmədi.