Həyatlarını riskə atan, həqiqət uğrunda prinsipial mübarizə aparanlar

Jurnalistika ənənəvi olaraq dünyanın ən təhlükəli peşələrindən biri olaraq qalır. Hər il dünyada onlarla jurnalist peşə vəzifələrini yerinə yetirərkən həlak olur. Jurnalistlər kimlərdir: sensasiya üçün hər şeyə hazır olan dəlisov yazıçılar, yoxsa həyatlarını və təhlükəsizliyini riskə atan həqiqət uğrunda prinsipial mübarizə aparanlar?

Jurnalist geniş dünyagörüşünə və eyni dərəcədə geniş əlaqələrə malik, başqaları ilə asanlıqla ortaq dil tapan, istənilən mövzuya tam şəkildə qərq ola bilən, insan psixologiyasını başa düşən, yumor və intuisiya hissinə malik və hətta birdən çox tapşırıq yerinə yetirərkən belə özünü rahat hiss edən çoxşaxəli bir mütəxəssisdir.

Lakin, bütün üstünlüklərinə baxmayaraq, jurnalist peşəsinin özünəməxsus çətinlikləri var.

Bu gün peşə borclarını yerinə yetirərkən həlak olan jurnalistlərin hekayələrini xatırlayaq. 

Azərbacanda vəzifə öhdəliklərini yetirərkən bu günə qədər bir neçə jurnalist həlak olub. Bu siyahıda onların bəziləri birinci Qarabağ müharibəsi, bəziləri isə ikinci Qarabağ müharibəsi zamanı şəhid olublar. Birinci Qarabağ müharibəsi zamanı peşəkar vəzifələrini sədaqətlə yerinə yetirən bir qrup azərbaycanlı jurnalistlər erməni əsgərlərinin qurbanı oldu. Təkcə 1991-ci ildə jurnalistlər Salatın Əsgərova, Osman Mirzəyev, Alı Mustafayev, Fəxrəddin Şahbazov və Kazımağa Kərimov şəhid oldular. 1992-ci ildə isə Milli Qəhrəman və jurnalist Çingiz Mustafayev həlak oldu. Onun kamerası Azərbaycanın müasir tarixinin ən faciəli anlarını əks etdirirdi. 

Müstəqilliyimizin ilk illərindən bəri Ermənistanın Azərbaycana qarşı silahlı hücumları nəticəsində minlərlə insan həlak olub. 1988-1994-cü illər Qarabağ müharibəsi zamanı 13 jurnalist erməni terrorçuları tərəfindən öldürülüb.

Bütün tədbirlərə baxmayaraq, azərbaycanlı jurnalistlərin ölümünün qarşısını almaq mümkün olmadı. Ermənistanın təslim olmasından cəmi səkkiz ay sonra AzTV-nin operatoru Sirac Abışov və AZƏRTAC-ın müxbiri Məhərrəm İbrahimov azad edilmiş Kəlbəcər rayonunda çəkiliş apararkən həlak oldular. Jurnalistləri daşıyan yük maşını tank əleyhinə minaya düşdü. Erməni işğalının, vandalizminin və terrorunun nəticələrini sənədləşdirərkən Sirac Abışov və Məhərrəm İbrahimov özləri qurban oldular.

Dövlət başçısının sərəncamı ilə Məhərrəm İbrahimov  və Sirac Abışov ölümündən sonra 3-cü dərəcəli "Vətənə xidmətə görə" ordeni ilə təltif ediliblər. 

Qəhrəman hərbçilərlə yanaşı, xidməti vəzifələrini yerinə yetirərkən həlak olan jurnalistləri, həqiqət uğrunda canlarından keçən qəhrəmanlarımızı həmişə xatırlayacağıq. Onların ifadələri - qeydlərinin hər hərfi, reportajlarının hər dəqiqəsi tarixin bir hissəsinə çevriləcək və yenidən yazmaq mümkün olmayacaq.

Xeyransa İsmayılova