“Bölünmüş dünyanı muzeylər birləşdirir”

18 May — Beynəlxalq Muzeylər Günü münasibətilə Masallıda keçirilən tədbir mədəniyyətin, tarixi yaddaşın və milli-mənəvi dəyərlərin təbliği baxımından əlamətdar olub. 
Tarix-Diyarşünaslıq Muzeyində “Muzeylər insanları və mədəniyyətləri birləşdirir” mövzusunda təşkil olunan tədbir Mədəniyyət İşçiləri Həmkarlar İttifaqı (MİHİ) Masallı Rayon Komitəsinin dəstəyi ilə baş tutub.
Beynəlxalq Muzeylər Şurası (ICOM) Azərbaycan Milli Komitəsinin “Bölünmüş dünyanı muzeylər birləşdirir” devizi altında keçirilən tədbirdə rayonun ziyalıları, mədəniyyət və incəsənət nümayəndələri, media əməkdaşları, gənclər, tələbələr və məktəblilər iştirak ediblər. 
Əvvəlcə Azərbaycanın ərazi bütövlüyü və suverenliyi uğrunda canlarını fəda etmiş şəhidlərin əziz xatirəsi ehtiramla anılıb.
Tədbiri giriş sözü ilə açan muzeyin direktoru, Əməkdar mədəniyyət işçisi Əntiqə Tağıyeva bildirib ki, muzeylər xalqın keçmişini bu günə daşıyan, milli irsi qoruyan və gələcək nəsillərə ötürən mühüm mədəniyyət ocaqlarıdır. O qeyd edib ki, müasir dövrdə muzeylər yalnız eksponatların nümayiş olunduğu məkan deyil, həm də maarifləndirici, tərbiyəvi və ictimai dialoq funksiyasını yerinə yetirən mədəniyyət mərkəzləridir.
Sonra çıxış edən Lənkəran-Astara Regional Mədəniyyət İdarəsinin Masallı rayonu üzrə nümayəndəsi Salman Yunusov, MİHİ rayon komitəsinin sədri Vəkil İsmailov, muzeyin elmi şurasının üzvləri, Əməkdar jurnalist Zakir Abbas, AJB rayon təşkilatının sədri Akif Ağayev, Masallı rayon Heydər Əliyev Mərkəzinin direktoru Dilbər İbayeva, Masallı Dövlət Regional Kollecinin direktor müavini Dilarə Hüseynova, Masallı Onbirillik Uşaq İncəsənət Məktəbinin direktoru Fərhad Qurbanov, Masallı Dövlət Rəsm Qalereyasının direktor əvəzi Təhmasib Məcidov və rayon Mərkəzi Kitabxanasının direktoru Zamin Məmmədov Beynəlxalq Muzeylər Gününün əhəmiyyətindən danışıblar.
Çıxışlarda vurğulanıb ki, muzeylər tarixi yaddaşın yaşadılması, milli-mədəni irsin qorunması, gənc nəslin vətənpərvərlik ruhunda formalaşdırılması baxımından mühüm rol oynayır. Natiqlər Azərbaycan mədəniyyətinin zənginliyinin qorunub gələcək nəsillərə çatdırılmasında muzey əməkdaşlarının əməyini yüksək qiymətləndirərək onları peşə bayramı münasibətilə təbrik edib, fəaliyyətlərində uğurlar arzulayıblar.
Tədbirin bədii hissəsində Masallı Dövlət Regional Kollecinin tələbələri və Hişkədərə kənd tam orta məktəbinin şagirdləri vətənə, tarixə və milli dəyərlərə həsr olunan şeirlər söyləyib, musiqi nömrələri ilə çıxış ediblər. 
Sonda muzeyin həyata keçirdiyi layihələrə və təşkil etdiyi tədbirlərə göstərdikləri dəstəyə görə bir sıra qurum və təşkilat nümayəndələrinə təşəkkürnamələr təqdim olunub.

Akif VAQİFOĞLU

foto: Elsevər Əliyev