“Kətanda oyanan hisslər” – sənətin ruhla qovuşduğu məkan

Sattar Art Qalereyası növbəti uğurlu sərgi layihəsini sənətsevərlərə təqdim etdi.
13 aprel 2026-cı il tarixində Bakı Fotoqrafiya Evi-ndə “Kətanda oyanan hisslər” adlı rəsm sərgisinin açılış mərasimi baş tutdu.

Sərgidə 50 rəssamın əsəri nümayiş olundu. Təqdim olunan tablolar yaradıcı yanaşma, fərdi baxış və daxili hisslərin ifadəsi ilə seçilirdi. İştirakçıların əksəriyyəti peşəkar rəssamlar olmaqla yanaşı, sənətdə öz dəst-xətti və sözünü demiş müəlliflər idi.

Sərginin təşkilatçısı Şəms Səttarzadə çıxışında layihənin əsas ideyasını belə ifadə etdi:

“Bu sərginin ərsəyə gəlməsində iştirak edən hər bir rəssama dərin təşəkkürümüzü bildiririk. Onlar öz hisslərini, düşüncələrini və ruhlarını kətana köçürərək bu əsərləri bizə etibar etdilər. Biz isə həmin əsərləri cəmiyyətə təqdim etmək şərəfini yaşadıq.”

“Kətanda oyanan hisslər” adı təsadüfi seçilməmişdir. Bu sərgi insanın daxili dünyasının rənglərlə danışdığı bir platformadır. Rəssamın kətan qarşısında yaşadığı duyğular – sevgi, sevinc, həsrət, kədər və ani xoşbəxtlik anları – hər bir əsərdə öz əksini tapır. Bu baxımdan sərgi yalnız vizual deyil, həm də emosional bir təcrübə təqdim edir.

Layihənin özəlliklərindən biri də müxtəlif sənət növlərinin bir araya gətirilməsi oldu. Sərgidə yalnız rəsm əsərləri deyil, eyni zamanda keramika, bədii toxuculuq və dekorativ sənət nümunələri də nümayiş olundu.

Sərginin açılış mərasimində Azərbaycan incəsənətinin tanınmış siması, xalq rəssamı, akademik, professor, Azərbaycan Rəssamlar İttifaqının sədr müavini Ağəli İbrahimov iştirak edərək layihəni yüksək qiymətləndirdi. O, belə genişmiqyaslı sərginin təşkilinin böyük zəhmət və peşəkarlıq tələb etdiyini vurğulayaraq, həm təşkilatçıya, həm də iştirakçı rəssamlara uğurlar arzuladı və təqdim olunan əsərlərin yüksək bədii səviyyəsini xüsusi qeyd etdi.

Sərgi həm iştirakçılar, həm də ziyarətçilər tərəfindən böyük maraq və müsbət rəylərlə qarşılandı. Bu isə layihənin əsas məqsədinə – sənəti insanlarla birləşdirmək missiyasına – uğurla çatdığını göstərir.

Fotolar: Elnarə Əhmədova