SattarArt qalereyasının təşkilatçılığı ilə “Novruz Ruhu” rəsm sərgisi keçirildi +FOTO=22

SattarArt qalereyasının təşkilatçılığı ilə 15 mart 2026-cı il tarixində Müasir İncəsənət Mərkəzinin qalereyasında “Novruz Ruhu” adlı rəsm sərgisi keçirildi. Sərgidə müxtəlif yaş qruplarından olan gənc və balaca rəssamların milli ruhu əks etdirən yaradıcı əsərləri nümayiş olundu.

AZpressTİMES.info xəbər verir ki, sərgi çərçivəsində seçilmiş əsərlərin müəllifləri xüsusi hədiyyələrlə mükafatlandırıldı. Eyni zamanda, 6 gənc və balaca rəssam diplom və hədiyyələrlə təltif edildi.

Sərginin təşkilatçısı Şəms Səttarzadə tədbirin əhəmiyyəti haqqında danışaraq bildirib ki, bu kimi sərgilər uşaqların və gənclərin incəsənətə marağının artmasına, onların yaradıcılıq potensialının inkişafına böyük stimul verir. Onun sözlərinə görə, müsabiqə və sərgilər gənclər arasında sağlam rəqabət mühitinin formalaşmasında da mühüm rol oynayır.

Qeyd olunub ki, xüsusilə milli dəyərlərimizi və Azərbaycan mədəniyyətini əks etdirən mövzulu sərgilər uşaqların ənənələrimizi daha yaxından tanımasına və milli ruhun formalaşmasına əhəmiyyətli töhfə verir. Novruz bayramına həsr olunan belə bir tədbirin keçirilməsi isə həm iştirakçılar, həm də sənətsevərlər üçün xüsusi sevinc mənbəyidir.

Sərginin sonunda SattarArt qalereyasının komandası bütün gənc və balaca rəssamları təbrik edərək, onlara yaradıcılıq yolunda uğurlar və davamlı inkişaf arzulayıb.

Fotolar: Elnarə Əhmədova