Masallıda Yazıçılar Günü qeyd olunub

“Dünyanı sözlə bilən insanlar”

Martın 3-də Masallıda Beynəlxalq Yazıçılar Gününə həsr olunmuş tədbir keçirilib. Rayon Mərkəzi Kitabxanasında “Dünyanı sözlə dəyişən insanlar” mövzusunda təşkil edilən görüşdə yerli yazarlar, ziyalılar, mədəniyyət işçiləri və gənclər iştirak ediblər.
Tədbir dünyasını dəyişmiş ədiblərimizin və torpaqlarımızın bütövlüyü uğrunda canından keçən şəhidlərimizin xatirəsinin bir dəqiqəlik sükutla yad olunması ilə başlayıb.
Kitabxananın direktoru Zamin Məmmədov çıxış edərək bildirib ki, görüşün əsas məqsədi yazarları bir araya gətirmək, onların həmrəyliyini gücləndirmək, yaradıcı insanlara diqqət və qayğını artırmaq, eyni zamanda kitaba və mütaliəyə marağı təşviq etməkdir.
Daha sonra Masallı Dövlət Regional Kollecinin tələbəsi Aynur Hacızadə Beynəlxalq Yazıçılar Gününün tarixi barədə məlumat verib. Qeyd olunub ki, bu əlamətdar gün 1921-ci ildən PEN International tərəfindən qeyd edilir. Təşkilatın adı ingilis sözləri olan “Poets” (şairlər), “Essayists” (oçerk yazanlar) və “Novelists” (romançılar) sözlərinin baş hərflərindən yaranıb. 1986-cı ildə PEN-in 48-ci beynəlxalq konqresində martın 3-ü “Yazıçının Ümumdünya Sülh Günü” elan edilib. Bir sıra ölkələrdə bu tarix sadəcə “Yazıçı Günü” kimi qeyd olunur və həmin gün söz adamları müxtəlif mükafatlarla təltif edilirlər. Bildirilib ki, eyniadlı təşkilat Azərbaycanda 2011-ci ildə fəaliyyətə başlayıb.
Tədbirin davamında yazıçılar Zakir Abbas, Dilşad Nüsrətqızı, Xodaşirin Cəbiyev, Akif Ağayev, Pərvanə Ziyadova və Sülhiyyə Tağızadə çıxış edərək müasir informasiya dövründə yazıçının məsuliyyətindən danışıblar. Natiqlər xalqın tarixini, milli kimliyini və mənəvi dəyərlərini yaşatmağın, insani dəyərləri uca tutmağın ədib üçün başlıca vəzifə olduğunu vurğulayıblar. Eyni zamanda, yazıçıların cəmiyyətdəki rolu və sözün gücü xüsusi qeyd edilib.
Belə görüşlərin əhəmiyyətinə toxunan çıxışçılar bildiriblər ki, bu cür tədbirlər həm ədəbiyyatın inkişafına, həm rayonun ədəbi mühitinin canlanmasına, həm də gənc nəslin formalaşmasına müsbət təsir göstərir.
Maraqlı diskussiya şəraitində davam edən tədbirdə oxucular yazarlara yeni və maraqlı əsərlərlə onları sevindirməyə davam edəcəklərinə əminlik ifadə ediblər.

Akif VAQİFOĞLU