Azərbaycan gəncliyi: gücümüz və ümidimiz

Hər il fevral ayının 2-də ölkəmizdə böyük təntənə ilə qeyd olunan Azərbaycan Gəncləri Günü dövlətimizin gənclərə göstərdiyi diqqət və qayğının parlaq təzahürüdür. Bu əlamətdar gün 1997-ci ildə Ümummilli Lider Heydər Əliyevin təşəbbüsü və müvafiq Sərəncamı ilə təsis edilmiş və o vaxtdan etibarən Azərbaycan gəncliyinin ictimai-siyasi həyatdakı rolunun daha da artırılmasına mühüm töhfə vermişdir.
Ulu Öndər Heydər Əliyev hər zaman gəncləri cəmiyyətin aparıcı qüvvəsi, ölkənin sabahı kimi dəyərləndirmiş, onların hərtərəfli inkişafını dövlət siyasətinin prioritet istiqamətlərindən biri elan etmişdir. Bu strateji xətt bu gün də Möhtərəm Prezident İlham Əliyev tərəfindən uğurla davam etdirilir. Gənclər siyasətinin müasir tələblərə uyğun şəkildə həyata keçirilməsi nəticəsində Azərbaycan gəncliyi bilikli, savadlı, müasir dünyagörüşlü, milli-mənəvi dəyərlərə sadiq və yüksək vətənpərvərlik ruhunda formalaşır.
Son illər ərzində gənclərin təhsil imkanlarının genişləndirilməsi, onların məşğulluğunun təmin edilməsi, sağlam həyat tərzinin təşviqi, eləcə də innovativ və yaradıcı təşəbbüslərə cəlb olunması istiqamətində mühüm dövlət proqramları və layihələr icra olunur. Gənclərimizin beynəlxalq olimpiadalarda, idman yarışlarında, elmi müsabiqələrdə və mədəni tədbirlərdə qazandıqları uğurlar ölkəmizin artan nüfuzunun göstəricisidir.
Xüsusilə qeyd etmək lazımdır ki, 44 günlük Vətən müharibəsində Azərbaycan gəncliyi misilsiz qəhrəmanlıq nümunəsi göstərmişdir. Torpaqlarımızın işğaldan azad olunmasında gənclərimizin şücaəti, iradəsi və vətənə sonsuz sevgisi tariximizə qızıl hərflərlə yazılmışdır. Bu, gənclərimizin təkcə intellektual deyil, həm də mənəvi cəhətdən nə qədər güclü olduğunu bir daha sübut etdi.
Rayonumuzun gəncləri də ölkəmizdə həyata keçirilən uğurlu gənclər siyasətindən bəhrələnərək ictimai həyatın müxtəlif sahələrində fəallıq göstərirlər. Onlar könüllülük hərəkatında, sosial layihələrdə, maarifləndirici tədbirlərdə, idman və mədəni-kütləvi proqramlarda yaxından iştirak edirlər. Rayon gənclər sektoru olaraq əsas fəaliyyət istiqamətimiz gənclərin təşəbbüslərinin dəstəklənməsi, onların asudə vaxtının səmərəli təşkili, bilik və bacarıqlarının inkişaf etdirilməsi, həmçinin cəmiyyətə inteqrasiyasına yardım göstərməkdən ibarətdir.
Əminik ki, dövlətin yaratdığı geniş imkanlardan səmərəli istifadə edən gənclərimiz gələcəkdə də Azərbaycanın sosial-iqtisadi inkişafında, elmin, mədəniyyətin və dövlətçiliyin möhkəmləndirilməsində mühüm rol oynayacaqlar. Güclü gənclik güclü dövlət deməkdir.
Bu əlamətdar gün münasibətilə bütün Azərbaycan gənclərini, o cümlədən rayonumuzun fəal və təşəbbüskar gənclərini səmimi-qəlbdən təbrik edir, onlara möhkəm cansağlığı, təhsildə və fəaliyyətlərində uğurlar, Vətənimizin tərəqqisi naminə yeni nailiyyətlər arzulayıram.

Sabiq CAHANGİROV,
Lənkəran-Astara Regional Gənclər və İdman İdarəsinin Masallı rayonu üzrə idman sektorunun müdiri