Gənclər Gününə həsr olunmuş tədbir keçirilib +FOTO=11

28 yanvar 2026-cı il tarixdə Azərbaycan Respublikasının Mədəniyyət Nazirliyi, Azərbaycan Teatr Xadimləri İttifaqı və İncəsənətin Tərəqqisinə Dəstək İctimai Birliyinin təşkilatçılığı ilə 2 Fevral -Azərbaycan Gəncləri Gününə həsr olunmuş tədbir keçirib. 
Azərbaycan Teatr Xadimləri İttifaqının Mustafa Mərdanov səhnəsində keçirilən tədbirdə görkəmli dövlət xadimləri, ziyalılar, gənclər və media nümayəndələri iştirak ediblər. 
Tədbir Azərbaycanın Dövlət Himninin səsləndirilməsi və torpaqlarımızın azadlığı uğrunda şəhid olmuş qəhrəmanlarımızın ruhunun bir dəqiqəlik sükutla yad edilməsi ilə açıq elan edilib.
Tədbiri giriş sözü ilə Teatr Xadimləri İttifaqının sədri, Xalq artisti, Dövlət mükafatı laureatı Hacı İsmayılov açaraq 2 fevral - Gənclər Günü münasibəti ilə gəncləri təbrik edib. O, yeni yaranmış İncəsənətin Tərəqqisinə Dəstək İctimai Birliyi ilə keçirilən tədbirin yaradıcı və istedadlı gənclərin aşkarlanması və inkişafına xüsusi töhfə verəcəyini, birgə əməkdaşlıq nəticəsində bu istiqamətdə fəaliyyətin genişləndiriləcəyini vurğulayıb. 
Məruzə ilə çıxış edən İncəsənətin Tərəqqisinə Dəstək İctimai Birliyinin sədri Turanə Orucova çıxışında 1996-cı il fevral ayının 2-də Müstəqil Azərbaycan Respublikası Gənclərinin 1-ci Forumunun keçirildiyini, həmin tarixin Azərbaycan Xalqının Ümummilli Lideri Heydər Əliyevin Fərmanı ilə Azərbaycanda Gənclər Günü kimi qeyd edildiyini bildirib. 
Natiq Gənclər Siyasəti haqqında Azərbaycan Respublikası Prezidentinin Fərmanını, Gənclər Siyasəti haqqında Azərbaycan Respublikasının Qanununu, bu sahədə həyata keçirilən Dövlət proqramlarını və s. gənclərin bütün sahələrdə inkişafına öz müsbət töhfəsini verdiyini və bu günkü müstəqil, güclü, qalib Azərbaycan gəncliyinin formalaşmasını təmin etdiyini vurğulayıb. 
Tədbirdə çıxış edənlər: Azərbaycan Respublikası Milli Məclisinin deputatları Ceyhun Məmmədov, Aydın Mirzəzadə, Yeni Azərbaycan partiyası Səbail rayon Təşkilatının sədri Muxtar Nağıyev, Teatr Xadimləri İttifaqının sədr müavini, Əməkdar artist, professor Azad Şükürov,  Nərimanov rayon Gənclər və idman sektorunun müdiri Bahəddin Hüseynov, 5-ci çağırış Milli Məclisin deputatı Dilarə Cəbrayılova, “Onur Plast” suvarma sistemləri MMC-nin direktoru Zöhrab Mustafazadə, AYB-nin üzvü, prezident mükafatçısı, şairə Zöhrə Qaraqızı və gənclər çıxış edərək 2 fevral - Gənclər gününün əhəmiyyətindən, gənclərin inkişafı istiqamətində həyata keçirilən Dövlət proqramlarından danışıblar.
Tədbir iştirakçılarına 44 günlük Vətən Müharibəsində qəhrəmancasına şəhid olmuş Kənan Seleymanlıya həsr olunmuş jurnal verilib.
İncəsənətin Tərəqqisinə Dəstək İctimai Birliyinin və Teatr Xadimləri İttifaqının rəhbərlərinin imzası ilə 30 nəfər yaradıcı və istedadlı gənc Təşəkkürnamə ilə təltif ediliblər.
Tədbir İncəsənətin Tərəqqisinə Dəstək İctimai Birliyinin “Zəfər yurdu” ansamblının vətənpərvərlik musiqiləri ilə davam edib.