Şairə Esmira Günəşin Biləsuvarda kitab təqdimatı olub

Azərbaycan Yazıçılar Birliyinin üzvü, Prezident mükafatçısı şairə Esmira Günəş 2026-cı ildə ilk tədbirini Biləsuvar rayonunda edib. Biləsuvar Mərkəzi Kitabxanasında baş tutan tədbirdə şəhid Azər Məmmədovun ailəsi, şəhid Əkrəm Kəlbiyevin ailəsi, "Xəzinə" ədəbi məclisinin rəhbəri Əli Aşiq, birliyin üzvlərindən şair Mirnəsiyət Mürsəlli, Mətanət Poladlı, Cəfər Şıxcan, Biləsuvar rayon Mərkəzi Kitabxanasının əməkdaşları, Şəhid Orxan Əkbərov adına Uşaq İncəsənət Məktəbinin şagirdi Quluzadə Humay, kitabxananın oxucuları və s. iştirak ediblər. Tədbir Şəhidlərin xatirəsinin bir dəqiqəlik sükutla yad edilməsi ilə başlayıb. Mərkəzi Kitabxananın direktoru Elşad Talıbov qonaqları salamlayıb və şairə Esmira Günəşin yaradıcılığından bəhs edərək, bildirib ki, Esmira xanım ölkədə şəhidlər haqqında ən çox kitab yazan şairədir. Onun yaradıcılığının böyük bir hissəsini vətənpərvərlik mövzusu və Şəhidlərə olan sevgisi təşkil edir. Daha sonra söz Esmira Günəşə verilib. Şairə xanım dəvət üçün Biləsuvar Mərkəzi Kitabxanasının rəhbərliyinə və Şirvan - Salyan regional mədəniyyət idarəsinə təşəkkür edib. Biləsuvar şəhidlərindən Azər Məmmədovun və Əkrəm Kəlbiyevin yer aldığı kitabları ailə üzvlərinə təqdim edib, həmçinin mərkəzi kitabxananın fonduna müxtəlif mövzularda nəşr olunmuş 18 kitabını hədiyyə edib.Tədbir boyu bütün şəhidlər yad olunub, xüsusilə də şairə Esmira Günəşin kitablarında yer alan şəhidlərdən əlavə Biləsuvar rayonu Mərkəzi Kitabxanasının rəhbəri Elşad Talıbovun şəhid kürəkəni Talıblı Asif Arif oğlu da yad edilib. Tədbirin gedişatında qonaqlar Humay Quluzadənin canlı ifasında "Xudayar təsnifini" və şairlərin Şəhidlər haqqında yazılmış şeirlərini dinləyiblər. Hətta şairə Esmira Günəşin Şəhid  Azər Məmmədovun xatirəsinə həsr etdiyi şeirini şəhidin qızı Zeynəb xanım səsləndirib. Tədbirin sonunda Kitabxana kollektivi adından şəhid ailələrinə və şairə Esmira Günəşə gül buketi hədiyyə olunub. Azər Məmmədovun qızı Zeynəb xanım isə şairə Esmira Günəşin portretini çəkərək, tədbirdə hədiyyə edib. 
Tədbir xatirə şəkilləri ilə yekunlaşdıqdan sonra qonaqlar çay süfrəsinə dəvət olunublar.