Fikrət Şiriyev:

Tanınmış ziyalı Qəhrəman Ağayevin doğum günüdür

Bu gün xalqımızın tanınmış ziyalılarından biri, Bakı Dövlət Universitetinin Fizika fakültəsinin dekanı (1989-1994),dekan müavini (1984-1989), Ümumi fizika kafedrasının professoru(1996-2005), fizika-riyaziyyat elmləri doktoru(1994) Qəhrəman Ağayev(1938-2005) anadan olmuşdur.

Qəhrəman Abdulla oğlu Ağayev 1938-ci il yanvarın 9-da Ağcabədi rayonunun Hüsülü kəndində ziyalı ailəsində dünyaya gəlmişdir. O, Ağcabədi rayonu Hindarx orta məktəbini bitirdikdən sonra 1956-cı ildə Azərbaycan Dövlət Universitetinin (indiki Bakı Dövlət Universiteti) Fizika-riyaziyyat fakültəsinin fizika ixtisasına qəbul olunmuşdur. 1961-ci ildə Universitetin Fizika fakültəsini bitirdikdən sonra bir müddət Azərbaycan Elmlər Akademiyasının müxtəlif İnstitutlarında işləmiş, 1967-ci ildə namizədlik(fəlsəfə doktoru), 1994-cü ildə doktorluq dissertasiyaları müdafiə etmişdir. 1973-cü ildən həyatını Bakı Dövlət Universiteti, onun Ümumi fizika kafedrası ilə bağlayan professor Qəhrəman Ağayev kollektivdə böyük nüfuz qazanmış, fakültənin Həmkarlar təşkilatının sədri, dekan müavini və dekanı kimi çoxşaxəli ictimai fəaliyyət göstərmişdir. Bunula yanaşı elmi tədqiqatlarını davam etdirmiş, “Kristalloqrafiya”,” Kristtallofizikaya giriş” kimi dərsliklər, 100-dən artıq elmi məqalə yazmış, müxtəlif beynəlxalq konfranslarda Azərbaycan elmini ləyaqətlə təmsil etmişdir.

Böyük alim, bacarıqlı elm-təhsil təşkilatçısı professor Qəhrəman Ağayev 2005-ci il aprelin 17-də Bakıda vəfat etmişdir. Onun əziz xatirəsi dostlarının, həmkarlarının, tələbələrinin ürəyində ehtiramla qorunur.

Allah rəhmət eləsin!