M.Vüsalə:

Gənc səhv edirsə,..öyrənmək imkanı var. Ahıl səhv edirsə...

Gənc həmkarımın səhv elədiyini düşünmürəm, ancaq bəzi dostlar israrla onu günahkar çıxarmaq istəyirlər. Əgər siz deyən kimidirsə, o zaman unutmamalıyıq ki, gənclik həm də səhv eləmək, təcrübəsizlikdir. Ahıllıq isə böyüklük, xoşgörülü olmaqdır.

Gənc səhv edirsə, onun sabah bu yanlışından öyrənmək imkanı var. Ahıl səhv edirsə, sadəcə dərin təəssüf hissi ilə başımızı bulayırıq... Dodaqaltı bir “nırç” deyirik... Çünki doğru davranışı öyrənmək üçün çox gecdir...

Bir də gəncliyi ilə vidalaşıb, amma böyüməyə çətinlik çəkənlər var ki, onlar üçün daha çətindir. Sizə asan gəlməsin, ölkədə bir tanınmış şəxs vəfat edən kimi 7/24 gözünü telefonundan ayırmayan kəsim var ki, görək hansı jurnalist ayağını bir az yan qoydu, yığılaq linç edək...

Yenə deyirəm, həmkarımın səhv etdiyini düşünmürəm, ancaq lap səhv edib, kim etmir ki? Bu gün jurnalistikada metr sayılan imzalar var ki, gəncliklərində getdikləri çəkilişlərdə etdikləri səhvlərdən lətifələr yaranıb...

Yalnız o adamlar səhv etmir ki, onlar heç bir iş görmür. Bu yaşa qədər bir ciddi araşdırmanın, müsahibənin altında imzaları yoxdur. Bir normal reportaj ortaya çıxarda bilməyiblər... Əslində səhvləri var – gənc həmkarını linçləmək həm yanlışdır, həm də etik deyil, ancaq onlar fərqində deyillər... Ona görə də “qüsursuzdurlar!”

Sadəcə bir misal çəkəcəm, bir neçə həftə öncə Xankəndidən “Sabaha saxlamayaq” üçün bağlantı edəndə həyəcandan Rəşad Məcidi sadəcə futbol azarkeşi kimi təqdim elədim. Doğru, sonradan özüm utandım, amma adam nə orada, nə də burada heç üzümə də vurmadı... “Səni mənim üstümə kim göndərib” şübhələri içində qovrulmadı. Çünki natamamlıq kompleksi yoxdur, içində jurnalistlərə nifrət böyütmür, ünsiyyət mədəniyyəti var və ən önəmlisi onu vəzifələri, statusları Rəşad Məcid eləmir.

Nəsə... Bir-birimizə düşmən kəsilməyək...

Sevməyi bacarmaq böyüklükdür. Bacarmayanlar gərək çalışıb özünü kindən, nifrətdən uzaq tuta... O da çətindir, bilirəm...

Gənclərə sevgilərlə!

Bu gün linçə məruz qalan gənc həmkarımı sevgi ilə qucaqlayıram! Möhkəm olun!