Ağcabədidə seminar-müşavirə keçirilib +FOTO=68

Dekabrın 25-də Ağcabədi Rayon İcra Hakimiyyətinin təşkilatçılığı ilə Ağcabədi Mədəniyyət Mərkəzində “Rayonda 2025-ci ilin təsərrüfat yekunları və 2026-cı il qarşıda duran vəzifələr” mövzusunda seminar müşavirə keçirilib. 

AZpressTİMES.info xəbər verir ki, müşavirədə Ağcabədi Rayon İcra Hakimiyyətinin başçısı Rafil Hüseynov, Ağcabədi Dövlət Aqrar İnkişaf Məkəzi, “Ağcabədi Taxıl” MMC, “Prime Cotton” MMC, “P-Agro” MMC-nin Ağcabədi filialı, "Azərpambıq” MMC-nin Ağcabədi pambıq istehsalı və emalı zavadonun kollektivləri, “Aqrolizing” ASC-nin Ağcabədi regional nümayəndəliyi, Ağcabədi Dənli Bitkilərin Toxum Emalı zavodunun rəhbərliyi, mütəxəssislər, rayon icra hakimiyyəti başçısı aparatının müvafiq şöbə müdirləri, şəhər, qəsəbə və kənd inzibati ərazi dairələri üzrə nümayəndələr, bələdiyyə sədrləri, fermerlər, Ağcabədi Su Meliorasiya  Sistemləri İstismarı İdarəsinin sahə rəisləri və sudan istifadəedənlər birliyinin rəhbərləri iştirak ediblər. 

Öncə rayon rəhbəri və qonaqlar tərəfindən mərkəzin həyətində müxtəlif çeşidli yerli və yüksək keyfiyyətli məhsullarından ibarət sərgiyə baxış keçirilib. Sahibkarlar və fermerlər icra başçısına öz məhsulları haqqında məlumatlar veriblər. 

Bundan sonra icra başçısı Rafil Hüseynov mərkəzin foyesində kənd təsərrüfatının müxtəlif sahələrini əhatə edən kitab və jurnallardan ibarət sərgi, həmçinin nadir bitkilərdən hazırlanmış və insan orqanizmi üçün faydalı salatlarla da tanış olub. Əkinçilik Elmi Tədqiqat İnstitutunun şöbə müdiri Sevil Abbasquliyeva salatlar, eləcə də salatda istifadə olunan qiymətli və nadir bitkilər haqqında ətraflı danışıb. 

Mədəniyyət mərkəzinin zalında davam edən seminar-müşavirədə rayon rəhbəri Rafil Hüseynov qonaqları salamladıqdan sonra tədbiri açıq elan edib. Bundan sonra Azərbaycan Respublikasının Dövlət Himni səsləndirilib. Ulu öndər Heydər Əliyevin, eləcə də torpaqlarımızın azadlığı uğrundan canından keçən Vətən qəhrəmanlarının xatirəsi bir dəqiqəlik sükutla yad edilib. 

Məruzə ilə çıxış edən  Ağcabədi Dövlət Aqrar İnkişaf Mərkəzinin direktoru Abbas Süleymanov qeyd edib ki, son illərdə Ağcabədi rayonunda aqrar sahədə sürətli inkişaf müşahidə olunur. Belə ki, cari il pambıqçılarımız üçün olduqca uğurlu il olmuşdur. Bugünədək pambıq əkini aparılmış sahələrdən 41000 tondan yuxarı məhsul əldə olunmuşdur ki, bu da son 10 ilin ən yüksək göstəricisidir. Bu işdə fermerlərin xüsusi fəallığını diqqətə çatdıran Abbas Süleymanov vurğulayıb ki, ümumiyyətlə fermerlərimizdən 298 nəfəri 45 sentnerdən yüksək məhsul əldə ediblər. 

Pambıqçılqla bərabər, taxıl, buğda, şəkər çuğunduru, meyvə istehsalı, baramaçılıq və heyvandarlıq sahələrində də əldə olunmuş uğurlar haqqında ətraflı məlumat verən natiq qarşıda duran vəzifələr və öhdəlikləri də iş adamlarının və fermerlərin diqqətinə çatdırıb.    

Bundan sonra məruzə ətrafında çıxışlara başlanılıb. “Prime Cotton” MMC-nin icraçı direktoru Rövşən Çobanzadə, “Azərpambıq” MMC-nin direktor müavini Ağahüseyn Qədirov,  “P-Agro” MMC-nin baş aqronomu Musa Hüseynov, Aqrar Sığorta Fondunun sədr müavini Roman Əmircanov, Əkinçilik Elmi Tədqiqat İnstitutunun şöbə müdiri, aqrar elmlər üzrə fəlsəfə doktoru Sevil Abbasquliyeva, “Ağcabədi Taxıl” MMC-nin icraçı direktoru Ceyhun Mehdiyev, “Prime Cotton” MMC-nin Ağcabədi filialının direktoru İbrahim Ağamirov və Ağcabədi Su Meliorasiya Sistemləri İstismarı İdarəsinin rəisi Asəf Quliyev hesabat xarakterli çıxışlarında təsərrüfat müəssisələrinin bu günə qədər gördükləri və bundan sonra görülməsi nəzərdə tutulan işlərdən ətraflı danışıblar.   

Çıxış edən Ağcabədi Rayon İcra Hakimiyyətinin başçısı Rafil Hüseynov rayonun təsərrüfat uğurlarının kökündə Ağcabədi zəhmətkeşlərinin xüsusi əməyinin olduğunu diqqətə çatdırıb. Təsərrüfatımızdakı uğurlu nailiyyətlərdən geniş danışan rayon rəhbəri bundan sonra qarşıda duran vəzifələr, həyata keçiriləcək işlərdən də söz açıb. Əminliklə qeyd olunub ki, Ağcabədi rayonu böyük təsərrüfat rayonudur və respublikanın aqrar sahəsindəki uğurlu nəticələrində Ağcabədi fermerlərinin zəhməti böyükdür.

Rafil Hüseynov eyni zamanda qarşıdan gələn “31 Dekabr – Dünya Azərbaycanlılarının Həmrəyliyi Günü” və Yeni İl münasibətilə hər kəsi təbrik edərək müşavirə iştirakçılarına sağlam, firavan ömür və işlərində uğurlar arzulayıb.  

Sonda rayonun kənd təsərrüfatının inkişafında, rayonun suvarma, pambıqçılıq, habelə barama və heyvandarlıq sahəsində yüksək nailiyyət əldə etdiyinə görə bir qrup zəhmətkeş Ağcabədi Rayon İcra Hakimiyyəti başçsının Fəxri fərmanları ilə təltif olunublar.