“Tarixi irsdən müstəqil dövlətçiliyə: Azərbaycan Konstitusiyasının rolu” – Masallıda tədbir 

Masallıda “Konstitusiya və Suverenlik ili”nə həsr olunmuş “Tarixi irsdən müstəqil dövlətçiliyə: Azərbaycan Konstitusiyasının rolu” mövzusunda tədbir keçirilib. 
“AZpress.AZ” İnformasiya Agentliyinin xüsusi müxbiri Akif Ağayev xəbər verir ki, Masallı 1 saylı mediasiya təşkilatı, tarix-diyarşünaslıq muzeyi və rayon mərkəzləşdirilmiş kitabxana sisteminin birgə təşkilatçılığı ilə gerçəkləşən tədbir öncəsi Ümummilli lider Heydər Əliyevin və vətən uğrunda canlarından keçən şəhidlərin xatirəsi bir dəqiqəlik sükutla yad edilib.
Masallı Tarix-Diyarşünaslıq Muzeyinin direktoru, Əməkdar mədəniyyət işçisi Əntiqə Tağıyeva müstəqil Azərbaycanın ilk Konstitusiyasının hazırlanmasında Ümummilli lider Heydər Əliyevin müstəsna xidmətləri, Konstitusiyanın əhəmiyyəti, onun prinsipləri, hüquqi qüvvəsi, insan hüquq və azadlıqları, 44 günlük Vətən müharibəsi, antiterror əməliyyatı, Zəfərin qazanılmasında cənab Prezident İlham Əliyevin qətiyyətli və müdrik siyasəti, ərazi bütövlüyümüz uğrunda əsgərlərimizin cəsarətlə döyüşməsi barədə danışıb.
Rayon icra hakimiyyətinin Yetkinlik yaşına çatmayanların işləri və hüquqlarının müdafiəsi üzrə komissiyanın məsul katibi Zamin Məmmədov, Masallı Rayon Mərkəzi Kitabxana Sisteminin baş biblioqrafı Günay Xəlilova mövzu ətrafında çıxış edərək öz fikirlərini bildiriblər.
Masallı 1 saylı mediasiya təşkilatının direktoru Xanhüseyn Səmədov Azərbaycanın tarixi, müstəqilliyin əldə edilməsi, müstəqil Azərbaycan Konstitusiyasının qəbulu, demokratiyaya gedən yol və demokratik prinsiplərin bir nümunəsi kimi ölkəmizdə mediasiyanın yaranması və mübahisələrin alternativ həlli kimi mediasiyanın tətbiqinin üstünlükləri barədə ətraflı məlumat verib.