Nazirlik Masallı UGİŞM-nin baş məşqçisini təltif etdi

Masallı rayonu Uşaq-Gənclər İdman-Şahmat Məktəbinin dərs hissə müdiri, futbol bölməsinin baş məşqçi-müəllimi Rövşən Zakir oğlu Süleymanov Azərbaycan Respublikası elm və təhsil naziri Emin Əmrullayevin 26 sentyabr 2025-ci il tarixli əmri ilə uşaq və gənclərin fiziki inkişafında və idmanın təbliğində səmərəli fəaliyyətinə görə və 5 oktyabr – Beynəlxalq Müəllimlər Günü münasibətilə Fəxri Fərmanla təltif edilib.
Məktəbimiz adından elm və təhsil nazirinə, eləcə də Lənkəran-Astara Regional Təhsil İdarəsinin müdiri Bəhruz Mevdiyevə və Masallı rayon sektorunun müdiri Elman Rzayevə Rövşən Süleymanovun timsalında Masallı UGİŞM-ə göstərdiyi diqqətə görə minnətdarlığımızı bildiririk.
Məlumat üçün bildirək ki, Süleymanov Rövşən Zakir oğlu 28 avqust 1975-ci ildə Masallı şəhərində anadan olub. 1981-1992-ci illərdə C.Cabbarlı adına Ərkivan qəsəbə 1 saylı və N.Nərimanov adına Masallı şəhər 2 saylı orta məktəblərində orta, 2003-2007-ci illərdə Azərbaycan Beynəlxalq Univeristetinin İdman faklutəsində ali təhsil alıb. 2007-ci ildən Lənkəran-Astara Regional Təhsil İdarəsinin nəzdindəki Uşaq-Gənclər İdman-Şahmat Məktəbində futbol bölməsində baş məşqiçi-müəllimi, 2025-ci ildən dərs hissə müdiri işləyir. 
2011-ci ildən AFFA-nın cənub bölgəsi üzrə nümayəndəsi və “Elit” layihəsinin cənub zonası üzrə kordinatorudur. 
Yeni Azərbaycan Partiyasının üzvüdür.
Əlavə edək ki, 10 yaşından futbol idman növü ilə məşğul olmağa başlayan Rövşən Süleymanov hələ orta məktəb illərində (1990-1995) Masallı rayonunun “Viləş” futbol klubunda yüksək liqada oynayıb. Hərbi xidməti zamanı (1995-1997) “Ordu İdman Klubu”nda (OİK), 1997-1998-ci illərdə “Xəzər Univeristeti”ndə (Bakı), 2000-2001-ci illərdə “Qarabağ” (Ağdam), 2001-2003-cü illərdə Gəncənin “Kəpəz”  futbol klublarında çıxış edib. Karyerası ərzində yüksək liqada 277 oyun keçirib, 37 top vurub.

Akif AĞAYEV