ETİHİ Masallı rayon komitəsinin sədri məktəbdə görüş keçirib

Elm və Təhsil İşçiləri Həmkarlar İttifaqı (ETİHİ) Masallı Rayon Komitəsinin sədri Rasim Nurullayev Banbaşı kəndində yerləşən Cavanşir Qasımov adına tam orta məktəbin pedaqoji kollektivi ilə görüş keçirib.
Görüş zamanı Rasim Nurullayev geniş təqdimatla çıxış edərək tədbirin məqsədi və əhəmiyyəti barədə iştirakçılara ətraflı məlumat verib. O, həmkarlar ittifaqının fəaliyyət istiqamətləri, həyata keçirilən sosial layihələr və qarşıya qoyulan əsas vəzifələr barədə danışıb. Xüsusilə, ittifaq üzvlərinin əmək hüquqlarının müdafiəsi, onların qanuni mənafelərinin qorunması, iş şəraitinin yaxşılaşdırılması, təhlükəsiz və sağlam əmək mühitinin yaradılması, eləcə də müəllimlərin istirahət və müalicə imkanlarının genişləndirilməsi istiqamətində görülən tədbirlər ətraflı şəkildə təqdim olunub.
Tədbir səmimi və qarşılıqlı fikir mübadiləsi şəraitində keçib. 
Görüş zamanı kollektiv üzvləri öz fikir və təkliflərini səsləndiriblər, mövcud problemlərlə bağlı suallarını ünvanlayıblar. Qaldırılan məsələlərin gələcək fəaliyyət planlarında nəzərə alınacağı vurğulanıb.
Sonda məktəb kollektivi səmərəli və faydalı keçən görüşə görə ETİHİ Masallı Rayon Komitəsinin rəhbərliyinə minnətdarlıq bildirib.

Akif AĞAYEV