150 yaşlı milli mətbuatımız və biz

 150 il bundan əvvəl H. B. Zərdabi əsasını qoyduğu “ƏKİNÇİ”də qəzetin, mətbuat və jurnalistikanın vəzifəsini müəyyənləşdirərək yazırdı: - “qəzet dərviş kimi nağıl deyə bilməz, onun borcudur işlərin yaxşı və yamanlığını ayna kimi xalqa göstərsin, ta xalq öz nikibədindən (nə gözlədiyindən, red.) xəbərdar olub, onun əlacının dalıncan olsun...”. 
Kişi hələ o vaxtı ana dilimizdə bizə deyib də, qəzetin işi nəyin pis, nəyin yaxşı olduğunu camaatı başa salmaqdı, bəzi-bəzi məsələdən xalqı xəbərdar etməkdi, ona yolun avandını göstərməlidi və s.
 Həsən bəyi görənlərdən birinin söylədiyi kimi, “dünyaya ac gəlib, ac getsə də” Kişinin adı tarixə düşdü. Onun  mübarizəsini sonrakı illərdə “Ziya”, “Kəşkül”, “Şərqi-Rus”, “İrşad”, “Kaspi”,  “Molla Nəsrəddin” kimi qəzet və jurnallar davam etdirsələr də,  ilk mətbuat orqanımız olan “Əkinçi” qəzeti Azərbaycanda əsil jurnalistika ənənəsini formalaşdırdı. 
      Bu mərhələyə çatmaq üçün qələm sahibi öncə jurnalistikadan adlayaraq publisistikaya çatmalı idi. Publisistikada fərdi üslubda, hadisəyə yanaşmada, deyim tərzində öz yolunu tapmalıdır. Bu mənada 150 yaşını qeyd etməyə hazırlaşdığımız “Əkinçi” qəzeti Milli Mətbuatımızın tarixi abidəsidir...
   Son illər əsasən Masallıda yaşadığımdan olur ki, yolum şəhər mərkəzindən düşür. İllərlə tanıdığım, yazılarına tez-tez rast gəldiyim, rayonda mətbuatın yayımı sahəsində xüsusi rolu olan şəxslər – Ayiq Səmədov, Akif Ağayev, Cəmil Məmmədov və digər ziyalılarla görüşürəm. Rayonun ictimai-siyasi həyatında onların hər birinin danılmaz xidməti olduğundan xəbərim var...  
  Gözlədiyim kimi, söhbət mətbuatımızın keçmişindən, bu günündən, xüsusilə region mətbuatının hazırki bərbad vəziyyətindən gedirdi... Söhbət mənimlə Akif müəllimin arasında bəzən mübahisə səviyyəsinə çatırdı... Sizə jurnalist Akif Ağayev haqqında qısa arayış verim:
   Bir vaxtlar Masallıda çıxan “Çağırış” (indiki “Yeni həyat”) qəzetində qocaman qəzetçi Həsənağa Əliyev Akif Ağayev haqqında bunları yazıb: - “Cəsarətli jurnalist olaraq Akif müəllim daim öyrənməyə, ensiklopedik yaddaşını zənginləşdirməyə, qəzetçiliyin incəliklərinə varmağa, janrların rəngarəngliyini artırmağa çalışır. O, yaradıcılığını hələ məktəb illərində, gəncliyində göstərə bilmişdi. Ötən əsrin 80-ci illərində “Çağırış” (“Yeni həyat”) qəzetində yazıları vaxtaşırı olaraq dərc edililirdi. Yazdığı lirik  şeirlər, qəzəllər, bədii ricətlər qəzet səhifələrində, jurnal və almanaxlarda çap olunub. Odur ki, elə ilk gündən jurnalistikada da sözünü deyə bildi. Daim yaradıcılıq axtarışındadır... Bir jurnalist olaraq Akif Ağayevin sıramıza gəlişi qəzetimizə yeni nəfəs, yeni üslub gətirib. Bu, təkcə bizim deyil, rayon ictimaiyyətinin, oxucuların fikridir. Sevinirəm ki, estafetimiz inamlı əllərdədir. Akif müəllim həm də bacarıqlı araşdırmaçıdır. Masallıda yunan-Roma güləş məktəbinin yaradıcısı, SSRİ idman ustası, Əməkdar məşqçi, respublika dərəcəli hakim, mərhum pəhləvan Nadir Ağayevin mənalı həyat və fəaliyyətindən bəhs edən “Pəhləvanın salnaməsi“ adlı kitabının və eyniadlı sənədli filmin müəllifidir. 
Yazıçı-publisist Akif Ağayevin yaradıcılığında vətənpərvərlik mövzusu daha çox diqqət cəlb edir. “Adiloğlu” nəşriyyatında çap olunan “Fitrətimizdədir vətənpərvərlik” kitabı rayon məktəblilərinin stolüstü dərs vəsaiti kimidir. 
Kitabda müəllifin Birinci və İkinci Qarabağ müharibəsində, eləcə də antiterror əməliyyatları zamanı Masallıdan olan şəhid və qazilərin şərəfli ömür yolundan bəhs edən yanğılı həyat hekayələri yer almışdır...
Akif Ağayevin jurnalistlik fəaliyyətinin dairəsi çox genişdir. “Yeni həyat” qəzetinin və eyniadlı saytın baş ədəbi işçisi, “AzPress.az”, “Azpresstaimes.info”, “QHT.az” informasiya agentliklərinin bölgə müxbiridir. AJB-nin, Azərbaycan İdman Jurnalistləri Assosiasiyasının üzvüdür. 
Azərbaycan İdman Jurnalistləri Assosiasiyasının “2017-ci ilin idman yazarı” media mükafatına və Azərbaycan Jurnalistlər Birliyinin H.B.Zərdabi Diplomuna layiq görülüb. Bu gün də rayonun sayılıb-seçilən ziyalılarındandır...” 
Dediyim kimi, söhbətin əsas mövzusu region mətbuatının bu günü ilə bağlı idi. Problemlərdən söz düşəndə, qeyd olundu ki, bu gün əyalət jurnalistikasının xeyli problemləri var. Məsələn, “Yeni həyat” qəzetinin mətbəəsi yoxdur. Nə qədər qəribə olsa da, bu gün sahibkarlar ticarət obyektləri açmaqda daha çox maraqlıdırlar. Lakin nədənsə onlardan heç biri mətbəə yaratmaq barədə düşünmür. Görünür, mətbəəyə gəlirsiz sahə kimi baxırlar. Halbuki, mətbəənin gəliri bu və ya digər ticarət obyektinin gəlirindən çox ola bilər.  İkinci bir məsələ: bölgənin mətbuatını, jurnalistikasını dirçəltmək və yaşatmaq üçün reklamlar önəmlidir. Lakin xeyli qadağalar mövcuddur. Məsələn, əyalət qəzeti məktəb həyatı və ya digər sənədi itdikdə bununla bağlı məlumat çap edə bilmir. Deyirlər həmin sənədlər filan qəzetdə dərc olunmalıdır. Mülkiyyətlə bağlı elanlarla da belə bir problem yaşanır. Halbuki belə şeylər KİV haqqında qanuna ziddir.  Onu da deyim ki, bu sahədə bölgə mətbuatının rəhbərlərindən qaynaqlanan problemlər də az deyil.  
 Bundan əlavə, bir zamanlar, jurnalistikaya kütləvi axın yarandı. Məhz bu kütləvi axın jurnalistikamızın əsas hədəflərdən yayınmasına gətirib çıxardı. Bu üzdən hazırda jurnalistikada savadsızlıq və qruplaşma meyilləri özünü açıq-aşkar göstərməkdədir... 
  Söhbətin bu yerində yaxınlıqdakı məsciddən azan səsi ucaldı...

Zakir ABBAS,
Əməkdar jurnalist, yazıçı-publisist.