İnci Mirzəyevanın "Rənglərin incisi" adlı fərdi sərgisi açılıb

11 iyun 2025-ci il Xətai sənət mərkəzində 3 nömrəli uşaq gənclər inkişaf mərkəzinin "təsviri sənət və dizayn" dərnəyinin üzvü İnci Mirzəyevanın "Rənglərin incisi" hər rəsmdə bir parça inci adlı ilk fərdi sərgisinin açılış mərasimi oldu.
Sərgidə yüzə yaxın  rəsm işi sərgilənirdi. İnci öz rəsmlərində müxtəlif mövzulara və janrlara müraciət etmişdir.
Rəsmlərdə vətənə olan sevgi, millilik, adət-ənənələr, bayramlar əsas ana xəttini təşkil edir. Bundan əlavə, portretlər, natürmortlar, təbiət mövzusunda olan rəsmlər, heyvanlara və quşlara olan sevgi də rəsmlərdən yan keçməmişdir .
İncinin qrafik üslubu sevdiyi üçün həm ağ -qara, həm də rəngarəng işləri ilə sərgisində böyük marağa səbəb oldu. 
İnci Mirzəyeva 5 yaşından 3 nömrəli Uşaq Gənclər İnkişaf Mərkəzinin "Təsviri sənət və dizayn dərnəyi"nin üzvüdür. İnci artıq 2 ildir rəssam Nərmin Abdullayevadan rəsm dərsləri alır. Nərmin Abdullayeva hər zaman öz tələbələrinə dəstək olur, onlara yeni texnikalar, maraqlı ideyalar və ən əsasıda yeni rəsmlərin ərsəyə gəlməsi üçün böyük həvəs yaradır.
Sərgiyə xalq rəssamı Siruz Mirzəzadə, xalq rəssamı Arif Hüseynov, Xətai sənət mərkəzinin direktoru Zahid Əvəzov, Azərbaycan Rəssamlar İttifaqının üzvləri, rəssamlar Sabir Qasımov, Nərminə Vəliyeva, Nigar Babayeva, Könül Orucova(ilk rəsm müəllimi) və digər hörmətli qonaqlar təşrif buyurmuşdur. Həmçinin İncini təbrikə onun dostları, qohumları gəlmişdir. 
Sərginin açılışında 3 nömrəli UGİM-nin direktoru, əməkdar müəllim Lalə xanım Qəti qonaqları salamlayaraq İnciyə ürək sözlərini və təbriklərini çatdırdı. Eləcə də qonaqlar İncini təbrik edib, ona gələcək fəaliyyətində uğurlar arzulayıb, dəyərli fikirlərlə bölüşdülər. 
Sərgidə 3 nömrəli UGİM-nin digər dərnək üzvləri də iştirak edərək tədbirə şən əhval-ruhiyyə qatdılar. Belə ki, "Çiçəyim" uşaq teatrının kiçik üzvləri rəssam Nərmin Abdullayevanın eskizləri əsasında hazırlanmış "Güllər kompozisiyası" adlı moda nümayişi etdilər. Daha sonra mərkəzin vokal qrupunun kiçik üzvləri " Qonaqlıq" mahnısını ifa etdilər və "Azəri inciləri" rəqs qrupu ifasında "Şən rəqs"ə tamaşa etdik. 
Sonda İncinin üzərində böyük əməyi olan valideynlərinə söz verildi. İnci də öz növbəsində ürək sözləri ilə ona dəstək olan insanlara təşəkkür etdi. Qonaqlar İncini həm sərgisi, həm də bu günkü ad günü münasibətilə təbrik etdi.

Mahir Əhmədov