Əhməd Orucoğlu: 

Qaydasız döyüş...

Olimpiya stadionunda Şöhrət ilə Ləyaqət arasında keçiriləcək qaydasız döyüş üzrə yarış tamaşaçılar arasında böyük ajiotaja səbəb olub. Yarışı işıqlandırmaq üçün dünyanın bir çox ölkələrindən jurnalistlər gəliblər. Oyun öncəsi keçirilən brifinqdə Şöhrətin məşqçisi Şan oyunun gərgin keçəcəyini bildirib. Ləyaqətin məşqçisi Mərifət isə 'rəqibi hər tərəfli öyrənmişik" deyib. Jurnalist kimin qalib gələcəyini soruşanda Şan deyib ki, Şöhrətin qalib gələcəyinə şübhə etmirəm. Mərifət ona cavab olaraq deyib ki, mən şübhə edirəm.

Oyun canlı yayımla yayımlandığınfan milyonlarla tamaşaçı oyunu ekran qarşısında izləyəcəkdi. Yarışı Beynəlxalq dərəcəli hakim Cəmiyyət idarə edəcəkdi...

Budur, Şöhrət ilə Ləyaqət stadionda görünürlər, tamaşaçılar onları coşqu ilə, əllərindəki plakatlarla qarşılayırlar.

Şöhrət ilə Ləyaqət isə tamaşaçıları özlərinə məxsus tərzdə salamlayırlar. Oyunun hakimi Cəmiyyət onları manejin mərkəzinə dəvət edir. Nəhayət çoxdan gözlənilən qarşılaşma başlanır. Şöhrət yarışın ilk saniyələrində hücuma keçir, rəqibinə bir necə zərbə endirir. Ləyaqət müdafiə olunur. Şöhrət növbəti zərbəni qurşaqdan aşağı vurur. Hakim oyunu saxlayır, ona xəbərdarlıq edir. Ləyaqətin məşqçisi Mərifət hakimə etirazını bildirir. Bir neçə qarşılıqlı zərbədən sonra birinci raund başa çatır. Manejin qırmızı küncündə Şan öz yetirməsi Şöhrətə məsləhətlər verir. Manejin göy küncündə isə Mərifət Ləyaqətə hücuma keçmək tapşırığını verir.

İkinci raund başlamazdan öncə, yarıçılpaq qız iki rəqəmi yazılmış lövhə ilə maneji dövrə vurub, tamaşaçıların alqış sədaları altında ortalığı tərk edir.

İkinci raund başlayır. Bu dəfə Ləyaqət hücuma keçir, bir necə zərbə endirir, Şöhrət müdafiə olunur . Ləyaqət dayanmaq bilmir. Şöhrət müdafiədən çıxaraq, əks-hücuma kecir, bir neçə zərbə vurur, Ləyaqət yerə yıxılır. Şöhrət onun başına daha bir zərbə endirir, hakim oyunu saxlayır. Tamaşaçılar Şöhrəti alqışlayırlar, Ləyaqətə də tibbi yardım göstərilir. Hakim Ləyaqətin vəziyyətinin ağır olduğunu görüb, yarışın bitdiyini elan edir, Şöhrətin əlini qaldırıb, onun qalib olduğunu göstərir. Şan manejə girib, Şöhrəti qucağına götürür.

Bu, Şöhrətlə Ləyaqət arasında keçirilən üçüncü görüş idi. Hər üç görüşdə Ləyaqət Şöhrətə uduzsa da, öz ləyaqətini itirmədi.

Yazıçı-dramaturq Əhməd Orucoğlu

* * *

Ильгар Асадов

Ləyaqəti lap ləyaxsız elədilər

Murshud Qadir

Ukrayna - Rusiya

Aytac Zeynalova

Əhməd Orucoğluya da, sizə də möhkəm can sağlığı, uğurlar arzulayırıq

QEYD. Başlıqlar "Facebook" sosial şəbəkəsindəki başlıqla eynilik təşkil edir.