Rəssam Ayfer Akbaşoğlunun “İnsan hekayələri” adlı sərgisi açılıb

Aprelin 18-də Qərbi Azərbaycan İcmasının təşkilatçılığı ilə “QGallery” qalereyasında türkiyəli rəssam Ayfer Akbaşoğlunun “İnsan hekayələri” adlı sərgisi açılıb.

AZpress.AZ xəbər verir ki, tədbirdə çıxış edən rəssam Ayfer Akbaşoğlu sərginin onun yaradıcılığında maraqlı iz qoyacağını bildirib.

Onun sözlərinə görə, rəsmlərin hər biri həyat hekayəsidir.

Sərginin kuratoru, sənətşünaslıq üzrə fəlsəfə doktoru Qalib Qasımov deyib: “Sərgidə təxminən 40-a yaxın rəsm əsəri nümayiş olunur. İnsan hisslərinin ifadəsi olan bu rəsmlər Qərbi Azərbaycan məsələsinin aktuallığını qoruması baxımından da əhəmiyyətlidir".

Qərbi Azərbaycan İcması İdarə Heyətinin sədri, Milli Məclisin deputatı Əziz Ələkbərli bildirib ki, bu sərgi Qərbi Azərbaycan həqiqətlərinin təbliği baxımından çox önəmlidir. “Sərgi, digər ölkələrdə yaşayan icma üzvlərinin və Türkiyə sənət adamları arasında əlaqələrin qurulması məqsədilə təşkil olunub. Sərginin “İnsan hekayələri” adlandırılması da təsadüfi deyil. Bu, Qərbi Azərbaycandan zorla çıxarılan həmvətənlərimizə həsr olunub. Burada əsas mesaj – hər birinin öz taleyi, öz yolu olan insanların ümumi arzusu olan qayıdış hüququdur. Sərgidəki əsərlər məhz onların məcburi köçkünlüyü və doğma torpaqlara qayıdış arzusuna həsr olunub. Bu gün Ayfer Akbaşoğlunun Bakıda ilk sərgisi açılır. Akvarel və ya yağlı boya ilə işləmək bir rəssam üçün xəyal qurmaq, xəyalları sənətə çevirmək, insanın ruhi varlığını kəşf etmək deməkdir. Bu, yaradıcılığın əsasını təşkil edir. Sərgidə təqdim olunan bir çox əsərdə Qərbi Azərbaycandan zorla çıxarılan insanların taleləri əks olunub. Aparılan bu işlərin nəticəsində ümid edirəm ki, bu mövzu sənət adamlarının daim diqqətində qalacaq”,- deyə o əlavə edib.

Xalq rəssamı Natiq Əliyev bu mövzunun çox vacib olduğunu söyləyib. “Mən çox şadam ki, Türkiyədən olan həmkarımız Qərbi Azərbaycan məsələsinə toxunub və bu həqiqətləri sənət dili ilə çatdırıb”.

Sonra iştirakçılar sərgi ilə tanış olublar.

Sərgi aprelin 24-dək davam edəcək.

Rüstəm İsmayılov