31 mart Azərbaycanlıların soyqırımına həsr olunan tədbir və telekörpü keçirildi

Bakı Şəhər Mədəniyyət Baş İdarəsi Yasamal rayon Mərkəzləşdirilmiş Kitabxana Sisteminin (MKS) M.Ş.Vazeh adına Mərkəzi Kitabxanası A.İ.Məmmədov adına 38 №-li tam orta məktəbdə tədbir və  Quba Soyqırımı Memorial Kompleksi ilə 31 mart – Azərbaycanlıların Soyqırımı Gününə həsr olunmuş telekörpü keçirdi. 
Tədbirlərdə 31 mart soyqırımı qurbanlarının, Vətən, torpaq uğrunda canlarından keçən şəhidlərimizin əziz xatirələri bir dəqiqəlik sükutla yad edildi.
M.Ş.Vazeh adına Mərkəzi Kitabxana Quba Soyqırımı Memorial Kompleksi ilə telekörpü yaratdı. Yasamal rayon MKS-nin direktoru, tarix üzrə fəlsəfə doktoru Lətifə Məmmədova mart soyqırımı haqqında danışaraq, arxivlərimizdə saxlanılan materiallardan məlumat verdi. Kompleksin əməkdaşı Abutalıb Turabov 31 mart soyqırımı haqqında məlumat verdi. O qeyd etdi ki, soyqırımı nəticəsində Bakı, Şamaxı, Quba, Salyan, Lənkəranda və s. on minlərlə dinc sakin etnik və dini mənsubiyyətinə görə qətlə yetirilib, yaşayış məntəqələri dağıdılıb, mədəniyyət abidələri, məscid və qəbiristanlıqlar yerlə-yeksan edilib. Daha sonra A.Turabov Quba Soyqırımı Memorial Kompleksi haqqında məlumat verdi. O, Kompleksin 2013-cü il sentyabrın 18-də açıldığını və indiyədək milyondan çox ziyarətçisi olduğunu qeyd etdi.
M.Ş.Vazeh adına Mərkəzi Kitabxananın əməkdaşı Lalə Səlimova çıxış edərək, 1918-ci ilin 30 mart – 3 aprel tarixləri arasında daşnak erməni silahlı dəstələrinin azərbaycanlılara qarşı törətdikləri vəhşiliklərdən, kütləvi qırğınlardan danışdı, bu soyqırımın Azərbaycan xalqının tarixində baş vermiş ən faciəli və qanlı hadisələrdən biri olduğunu bildirdi. Uşaq şöbəsinin müdiri Sevil Namazova və məktəbin kitabxana müdiri Səbinə Abbasova ermənilərin soydaşlarımıza qarşı törətdiyi soyqırımlara həsr olunan kitablarla, vəsaitlərlə məktəbliləri tanış etdilər.
Məktəbin direktoru Gülnarə Bəkirova, təlim-tərbiyə işləri üzrə direktor müavini Gülnarə Vəliyeva, tarix müəllimi Şölə Qayıbova bu faciəli günün tarixi ilə bağlı çıxış edərək, soyqırıma hüquqi-siyasi qiymətin verilməsində Ümummilli Lider Heydər Əliyevin müstəsna rolu olduğunu, Ulu Öndərin 26 mart 1998-ci il tarixli Fərmanı ilə 31 mart Azərbaycanlıların Soyqırımı Günü elan edildiyini qeyd etdilər.
Məktəbin 8 və 9-cu sinif şagirdləri – Sədəf Məmmədli, Banu Məmmədli, Nilay Məmmədova, Rasim Hacıdadaşov və Çinar Əzimzadə hadisə ilə bağlı fikirlərini bildirmiş, bu qanlı hadisələrin onların yaddaşından heç vaxt silinməyəcəyini vurğulamışlar.