“Vətəni sevməyən insan olmaz” – Masallıda anım tədbiri 

“20 Yanvar Azərbaycan xalqının milli azadlıq uğrunda, öz mənliyini müdafiə etmək yolunda göstərdiyi qəhrəmanlıq nümunəsidir”.

Ulu öndər Heydər Əliyev

Masallıda Azərbaycanın suverenliyi və istiqlaliyyət  rəmzi olan 20 yanvar faciəsinin 35-ci ildönümü ilə bağlı “Vətəni sevməyən insan olmaz” adlı anım tədbiri keçirilib. 

Masallı Tarix-Diyarşünaslıq Muzeyində təşkil olunan tədbirdə idarə və təşkilat rəhbərləri, mədəniyyət, media işçiləri, gənclər və tələbələr iştirak ediblər.

Əvvəlcə vətənimizin  müstəqilliyi, torpaqlarımızın bütövlüyü uğrunda canından keçən şəhidlərimizin əziz xatirəsi ehtiramla anılıb. 

Tədbiri giriş sözü ilə açan muzeyin direktoru, Əməkdar mədəniyyət işçisi Əntiqə Tağıyeva 1990-cı ilin 20 Yanvar faciəsinin xalqımızın istiqlaliyyət əzminin, sarsılmaz iradəsinin sübutu, dövlət müstəqilliyinin bərpa edilməsinə doğru aparan yol, milli qürur günü kimi xarakterizə edib. 

Lənkəran-Astara Regional Mədəniyyət İdarəsinin Masallı rayonu üzrə nümayəndəsi Salman Yunusov, Ombudsmanın Cənub Regional Mərkəzinin rəhbəri Ziya İsmayılov, Dini Qurumlarla İş üzrə Dövlət Komitəsinin Masallı regional bölməsinin müdiri Elvin Hüseynli, “Yeni həyat” qəzetinin əməkdaşı Akif Ağayev, Lənkəran-Astara Regional Gənclər və İdman İdarəsinin Masallı rayonu üzrə sektor müdiri Sabiq Cahangirov 1990-cı il yanvar ayının 19-dan 20-nə keçən gecə keçmiş SSRİ rəhbərliyinin göstərişi ilə  sovet hərbi birləşmələrinin Azərbaycan xalqına, dinc əhaliyə qarşı törətdiyi cinayətlərdən danışıb, xatirələrini bölüşüblər. 

Çıxışlarda bildirilib ki, faciədən bir gün sonra ümummilli liderimiz Heydər Əliyev ailə üzvləri ilə böyük cəsarət və xalqına bağlılıq hissi ilə Azərbaycanın Moskvadakı daimi nümayəndəliyinə gələrək sovet rəhbərliyinin xalqımıza  qarşı həyata keçirdiyi dəhşətli cinayəti kəskin pisləyən bəyanatla çıxış etdi: “Ulu öndərin tövsiyəsi ilə 1994-cü il martın 29-da qəbul edilən qərarda 20 Yanvar faciəsinə ilk dəfə dövlət səviyyəsində tam siyasi-hüquqi qiymət verildi. 

Xalqımız həmin hadisələrdə şəhidlər versə də, igid Vətən övladlarının sarsılmaz iradəsindən, milli ruhun sarsılmazlığından, istiqlaliyyət əzmindən yoğrulmuş şanlı qəhrəmanlıq tarixi yaratdı. 20 Yanvar şəhidlərinin ruhu şaddır, onların və Birinci Qarabağ müharibəsi şəhidlərinin qisası alınıb. Prezident, Müzəffər Ali Baş Komandan İlham Əliyevin rəhbərliyi ilə rəşadətli Azərbaycan Ordusu doğma torpaqlarımızı Ermənistanın işğalından azad edib, həmin ərazilərdə Azərbaycan bayrağı dalğalanır...”

Sonda tədbir iştirakçıları 20 yanvar faciəsinin qəhrəmanlıq səhifəsini  özündə əks etdirən foto və  Masallı Dövlət Rəsm Qalereyası üzvlərinin rəsm işlərindən ibarət sərgiyə baxış keçiriblər.

Akif VAQİFOĞLU