İdmançıların böyük dostu və hamisi

"Gənc nəslin vətənpərvərlik ruhunda tərbiyə edilməsində idman nə qədər vacibdirsə, bir o qədər də hərbi hazırlıq və fiziki hazırlıq vacibdir". 

Prezident İlham Əliyev

Digər sahələrdə olduğu kimi idman sahəsində də Ulu öndər Heydər Əliyevin təməlini qoyduğu ənənə uğurla davam etdirilir. Ölkə rəhbəri, Milli Olimpiya Komitəsinin prezidenti cənab İlham Əliyev respublikamızda idmanın kütləviliyinin təminatına böyük diqqət yetirir, idmançılara yüksək səviyyədə dəstək göstərir.

Müstəqil respublikamız dünyada idman ölkəsi və istedadlı idmançıların vətəni kimi tanınır. Ölkə idmanının inkişafı beynəlxalq miqyasda böyük marağa səbəb olub.

Hər il olduğu kimi 2024-ci il də Azərbaycan idmanı üçün uğurlu il olmuşdur. 

İlin idman yekunlarına həsr olunan mərasimdə dövlət başçısının vurğuladığı kimi, 2024-cü il də Azərbaycan idmanı üçün uğurlu olmuşdur. Azərbaycan idmançıları beynəlxalq yarışlarda ölkəmizi ləyaqətlə təmsil etmişlər, 1700-ə yaxın medal qazanılmışdır. Bu, onu göstərir ki, idmanımız inkişaf edir, yeni nəsil idmançılar yetişir və beləliklə, Azərbaycan idman dövləti kimi öz gücünü müxtəlif beynəlxalq yarışlarda təsdiqləyir.

Prezident öz çıxışında  söylədi ki, hazırda bizim bölgələrimizdə 44 Olimpiya İdman Kompleksi fəaliyyət göstərir və bu idman komplekslərinin bundan sonra da inşası nəzərdə tutulur. Müxtəlif bölgələrdə, o cümlədən Qarabağ bölgəsində, Bakı şəhərində ən müasir idman infrastrukturumuz vardır.

Bu, Azərbaycanda idmana və idmançılara göstərilən diqqət və qayğının bir nümunəsidir. Belə ki, ölkə paytaxtı ilə yanaşı regionlarda da yeni idman meydançalarının, zalların tikilməsi, onların zəruri avadanlıqlarla təchiz edilməsi kimi infrastrukturun yaradılması həmişə diqqət mərkəzindədir.

Bu gün ölkəmiz beynəlxalq idman yarışlarının mahir təşkilatçısı rolunda çıxış edir. Çıxışı zamanı Prezident növbəti tədbirlərin anonsunu verərək bildirdi ki, gələn il Azərbaycan növbəti böyük idman yarışına ev sahibliyi edəcək, bu da MDB Oyunlarıdır. Üçüncü MDB Oyunları Azərbaycanda keçiriləcək. Bunun üçün 14 şəhər seçilibdir və əsas oyunlar Gəncə şəhərində keçiriləcək. Gəncə şəhəri MDB Oyunlarının mərkəzi olacaq. Gəncədə yeni stadion inşa edilir və Oyunlara qədər istismara verilməlidir.

Qürur hissi ilə qeyd etmək lazımdır ki, işğaldan azad edilmiş ərazilərimizdə də idman infrastrukturu yaradılır. Cənab Prezidentin dediyi kimi “Ağdam şəhərində yeni, bütün beynəlxalq standartlara cavab verən stadion inşa edilir. Füzuli şəhərində Olimpiya İdman Kompleksinin təməli qoyulub. Suqovuşan və Köndələnçay su anbarlarında artıq beynəlxalq avarçəkmə yarışları keçirilir. Şuşa şəhərində bir neçə idman yarışı keçirilmişdir. Xankəndi şəhərindəki stadion, - hansı ki, Azərbaycan büdcəsi hesabına hələ keçən əsrin 50-ci illərində inşa edilmişdir, - əsaslı şəkildə təmir edilir, demək olar ki, yenidən qurulur.” 

Son illər idmançılarımızın əldə etdikləri nailiyyətlər onu deməyə əsas verir ki, Azərbaycanda Olimpiya Hərəkatı yeni inkişaf dövrünü yaşayır. Lakin biz bununla kifayətlənməməliyik. Prezidentin səsləndirdiyi “Bizim bundan sonrakı fəaliyyətimiz təbii ki, idmanın inkişafı ilə bağlı olacaq. Çünki bütün lazımi qərarlar verilib, bütün müvafiq strukturlar, federasiyalar, klublar, idman cəmiyyətləri, Olimpiya Komitəsi, nazirlik vahid strategiya əsasında fəaliyyət göstərirlər” mesajı bizi daha məhsuldar işləməyə səfərbər edir.  

Necə ki, Ali Baş Komandanımızın çıxışında söylədiyi “Əminəm ki, bu şanlı Qələbəmiz hər bir Azərbaycan gənci üçün əlavə ruhlandırma amili olacaq. Biz döyüş meydanındakı Zəfərimizə idman qələbələrini də əlavə etdik və bu, əlbəttə ki, ölkəmizin beynəlxalq nüfuzunu daha da artırır. Çünki idmanın inkişafı hər bir ölkənin ümumi inkişafının nümayişidir, onu əks etdirir.” fikri biz gənclərə olan inamın parlaq ifadəsidir. 

İstər döyüş, istərsə də idman meydanında qalib dövlət kimi tanınan Azərbaycanın idmançıları bundan sonra böyük uğurlara imza atacaq. 

Hələ bizi çox qələbələr, yüksəlişlər gözləyir.

Sabiq CAHANGİROV,

Lənkəran-Astara Regional Gənclər və İdman İdarəsinin Masallı sektorunun müdiri,

YAP Masallı rayon təşkilatının fəal üzvü.