“Azərbaycanlı alimin dünya meridianları” sənədli filmi təqdim olunub

10 fevral 2024-cü il tarixində Nizami Kino Mərkəzində professor Əsgər Zeynalovun həyat və yaradıcılığından bəhs edən “Azərbaycanlı alimin dünya meridianları” adlı sənədli filmin təqdimat mərasimi keçirildi. 
Sənədli film professor Əsgər Zeynalovun həyat və yaradıcılığından bəhs olunur. Əslən Qərbi Azərbaycandan olan alimin yaradıcılıq yolundan bəhs edən filmdə Atatürk Mərkəzinin direktoru, MM-in deputatı, akademik Nizami Cəfərov, akademik Muxtar İmanov, ADU-nun prorektoru, keçmiş AR baş naziri, professor Novruz Məmmədov, AZMİU-nun rektoru, professor Gülçöhrə Məmmədova, ADU-nun kafedra müdiri, professor Cəlil Nağıyev, ADU-nun Azad Həmkarlar Təşkilatının sədri Miskər Məmmədov  və digər ziyalılar, ailə üzvləri yer alıb.
Zəngəzur İnformasiya Agentliyinin dəstəyi ilə hazırlanan filmin rejissoru Mircəlil Ağayev, ssenari müəllifi və redaktoru Rövşən Vəliyevdir. 
Tədbirdə AMEA Tarix İnstitutunun Qərbi Azərbaycan tarixi şöbəsinin müdiri Cəbi Bəhramov, Qərbi Azərbaycan İcması İdarə Heyətinin üzvü, Milli Qeyri-Hökumət Təşkilatları Forumunun (MQF) prezidenti Rauf Zeyni, ADU-nun Azad Həmkarlar Təşkilatının sədri Miskər Məmmədov, Azərbaycan Milli Konservatoriyası nəzdində Musiqi Kollecinin direktoru, Əməkdar artist, professor Nazim Kazımov, AMKM-nin baş direktoru, Əməkdar mədəniyyət işçisi, professor Tahir Əmiraslanov, filologiya elmləri namizədi Tofiq Abdullayev, “Vedibasar” qəzetinin baş redaktoru Sərtib İslamoğlu, ADU-da kafedra müdiri, dosent Fialə Abdullayeva və digər ziyalılar, Əsgər müəllimin dərs dediyi tələbələr çıxış ediblər. Çıxış edənlər Əsgər Zeynalovun istər vətən həsrəti ilə qələmə aldığı “İrəvan ziyalıları” kitabının əhəmiyyətindən, istərsə də Fransız ədəbiyyatının iki dahi şəxsi Volter və Hüqo haqqında arşdırmalarından, onun təkcə alim, ziyalı, müəllim kimi deyil, həm də insani keyfiyyətlərindən, elinə-obasına bağlı əsl vətənpərvər olmazından söhbət açıblar. 
  Tədbirdə ziyalılar, Əsgər Zeynalovun tələbələri, ailə üzvləri və yaxınları iştirak ediblər.
​Qeyd edək ki, Əsgər Zeynalov Azərbaycan Jurnalistlər (1997) və Azərbaycan Yazıçılar Birliyinin (1998), Nyu York Elmlər Akademiyasının (2017) üzvü, Özbəkistan Turan Elmlər Akademiyasının Akademiki (2018), Parisdə fəaliyyət göstərən Viktor Hüqonun Dostları Cəmiyyətinin üzvü (2019), Türk Dünyası Araşdırmalar Beynəlxalq Akademiyasının Akademiki (2019), Almaniyada fəaliyyət göstərən Avropa Təbiət Elmlər Akademiyasının Akademikidir.
Tədqiqatçı alim 40-a yaxın kitabın, 400-dən artıq elmi-publisistik məqalənin müəllifidir. Azərbaycan ədəbiyyatşünaslığında Volter və Hüqo haqqında ilk monoqrafiylar da onun qələminə məxsusdur. 
Əsgər Zeynalovun kitabları 10-dan artıq ölkədə - Avstraliya, Kanada, ABŞ, Almaniya, Fransa, İsveç, İngiltərə, Hindistan və digər ölkələrdə nəşr olunub. 
Qonaqlar alimi belə əlamətdar hadisə münasibətilə təbrik edib, ona elmi fəaliyyətində bundan sonra da uğurlar arzulayıb, xatirə şəkli çəkdiriblər.
Tədbirin sonunda Əsgər Zeynalov öz növbəsində toplaşan qonaqları salamladı, tədbirin təşkilatçılarına minnətdarlığını bildirdi və onun üçün əlamətdar gündə onunla sevinci bölüşən hər kəsə təşəkkür etdi.
Qeyd edək ki, sənədli filmin təşkilati dəstəkçisi Zəngəzur İnformasiya Agentliyidir.