31 Dekabr - Dünya Azərbaycanlılarının Həmrəyliyi Günü və Yeni il münasibətilə şəhid ailəsi ziyarət edilib

31 Dekabr - Dünya Azərbaycanlılarının Həmrəyliyi Günü və Yeni il münasibətilə Gənclər üçün Təhsil Mərkəzi (GTM) Qarabağ ofisinin əməkdaşları şəhid Əlimərdan Qəhrəmanovun ailələsinə baş çəkib, bayram münasibətilə onları təbrik ediblər.

"AzPress" İnformasiya Agentliyinin AZpressTİMES.info xəbər saytının bölgə müxbiri xəbər verir ki, görüşlərdə Azərbaycanın suverenliyi və ərazi bütövlüyü uğrunda canlarından keçən şəhidlərimizin xatirəsi ehtiramla yad olunub. Qeyd edilib ki, Prezident, Müzəffər Ali Baş Komandan İlham Əliyevin dəmir iradəsi, rəşadətli Silahlı Qüvvələrimizin qəhrəmanlığı nəticəsində 44 günlük Vətən müharibəsində əldə edilmiş Böyük Zəfər dünyanın müxtəlif ölkələrində yaşayan həmvətənlərimizi daha da ruhlandırıb, onların ümummilli maraqlar ətrafında sıx birləşməsinə zəmin yaradıb.

Bildirilib ki, Vətən müharibəsi Azərbaycan xalqının şanlı Zəfər tarixidir. Bu tarix Azərbaycan əsgərinin qanı, canı bahasına əldə edilib. Buna görə də hər bir şəhidin keçdiyi həyat yolu gənclərimiz üçün nümunədir. Odur ki, gənclərimizin şəhid ailələrini ziyarət etməsi, onların döyüş yolu ilə yaxından tanış olmaları gələcək nəsillərdə vətənpərvərlik hissinin daha da möhkəmləndirilməsində mühüm rol oynayır.

Görüşdə övladları haqqında xatirələrini bölüşən şəhid valideynləri göstərilən diqqət və qayğıya görə minnətdarlıqlarını bildiriblər.

GTM Qarabağ ofisi tərəfindən ailəyə bayram sovqatı çatdırılıb.

Mais İbrahimov