Şəhid Oleq Cəfərovun birinci il dönümüdür 

19 sentyabr 2023-cü ildə baş vermiş lokal xarakterli antiterror əməliyyatları zamanı Şəhid Oleq Cəfərovun bu gün il dönümüdür.

Şəhid ailələri, hərbiçilər, müəllimlər, həkimlər, şəhidin doğmaları və şəhidsevərlər ilk öncə şəhidin məzarını ziyarət ediblər. Daha sonra isə şəhidin ata ocağında təşkil olunmuş ehsan süfrəsinə qonaq olublar. Qonaqlar arasında şairə Esmira Günəş də olub. Şairə xanım şəhidin ailəsinə başsağlığı verərək bildirib ki, şəhid Oleq Cəfərovun xatirəsinə həsr etdiyi kitablar tezliklə işıq üzü görəcək. Şairə xanım onu da qeyd edib ki, bu dəfə Oleqin ocağına 44 günlük Vətən müharibəsinin qəhrəmanı Xudat şəhidi Fəxrəddin Fərəcovun anası ilə gedib. Şəhid Fəxrəddin Fərəcovun ailəsi adından şəhid Oleqin ailəsinə gül və hər iki şəhidin şəklinin yer aldığı çərçivəni təqdim edib. Şəhid Oleqin anası Tinatin xanım şəhid anasını Bahar xanımı qucaqlayaraq dərd ortağını bağrına basıb. Esmira Günəş şəhidin məzarını ziyarət edərkən bildirib ki, Qusarın İmamqulukənd kəndi hər müharibədən bir şəhid verib torpağa. Kəndin ilk şəhidi Fəzail Əbiyev ilk Qarabağ savaşlarının şəhididir. Murad Məmmədov 44 günlük savaşların şəhididir. Oleq Cəfərov isə antiteror şəhidi oldu. Hər üç şəhidin məzarı ziyarət olunub. Ruhları şad olsun.

Esmira Günəş