Bu gün şəhid Elçin Hüseynovun ad günüdür

Hüseynov Elçin Zamin oğlu 6 sentyabr 1992-ci ildə Bakı şəhərinin Binəqədi rayonunda anadan olub. 1999-cu ildə Sumqayıt şəhər 9 saylı məktəbdə birinci sinifə daxil olub. 2010-cu ildə Sumqayıt Dövlət Texniki Kollecinin “Gömrükxana işi” fakultəsinə qəbul olub. 2012-ci ildə həmin 
kolleci bitirib və hərbi xidmətə yola düşüb. 2014-cü ilin yanvar ayı hərbi xidmətini başa vurub. Həmin ilin avqust ayı MAXE kimi yenidən ordu sıralarına qayıdaraq xidmətinə davam edib. 2016-cı ilin Aprel döyüşlərində də könüllü iştirak edən qəhrəman illər sonra Tovuz döyüşlərinə də könüllü qatılıb. 27 sentyabr 2020-ci ildə başlayan vətən müharibəsində də öndə gedən igidlərdən birinə çevrilən Elçinin döyüş yolu Suqovuşan, Ağdərə və Ağdamdan keçib.
Tabeliyində olan snayperi dəqiq idarə etdiyindən “Şahin gözlü” ləqəbi ilə çağrılan Elçin Hüseynov qızğın döyüşlər zamanı 2 oktyabr 2020-ci il tarixində şəhadətə ucalıb. 15 gün sonra neytral ərazidən çıxarılan cansız bədəni oktyabrın 17-si Sumqayıt Şəhidlər Xiyabanında torpağa tapşırılıb. Subay idi. Elçinin anası da hərbiçi olub.Şəhid Elçin Hüseynov “Vətən uğrunda”, “Suqovuşanın azad olunmasına görə” medalları və “Rəşadət” ordeni ilə təltif olunub.
Şəhid ailələri və şəhidin sevərlər ilk öncə Sumqayıt Şəhidlər Xiyabanında Elçin Hüseynovun məzarını ziyarət edib, daha sonra isə evində təşkil olunmuş ehsan süfrəsinə qonaq olublar. Qonaqlar arasında AYB nin üzvü şairə Esmira Günəş də olub. O, şəhid Elçin Hüseynovun da yer aldığı "Cəsur Qəhrəmanlar" kitabını şəhid anasına hədiyyə edib. Xaçmazdan gələn şəhid Fəxrəddin Fərəcovun bacısı isə hər iki şəhidin şəkli yer almış çərçivəni Elçinin ev guşəsinə hədiyyə edib. Qonaqlar xatirə şəkilləri çəkdirərək ayrılıblar. Qeyd edək ki, Hüseynovlar ailəsində şəhidin yeni doğulan qardaşı oğluna Elçinin adı qoyulub. Bu ailədə daha bir qəhrəman böyüyür.