Şəhid Ramil Rəhimovun ailəsi ziyarət edilib

AYB-nin üzvü şairə Esmira Günəş sentyabrın 4-ü Abşeron rayonu Ceyranbatan qəsəbəsində şəhid Ramil Rəhimovun ailəsini ziyarət edib. 
Rəhimov Ramil Sücəddin oğlu Rəhimov Ramil Süccəddin oğlu yanvarın 1-i 1992-ci ildə Abşeron rayon Ceyranbatan qəsəbəsində anadan olub. 1998-ci ildə Ceyranbatan qəsəbəsi 1 saylı tam orta məktəbdə birinci sinifə daxil olub. 2007-ci ildə təhsilini Bakı Dövlət Sosial-İqtisad kollecində davam etdirib. 2011-ci ildə kolleci müvəffəqiyətlə başa vuraraq, hərbi xidmətə yola düşüb. Hərbi xidmətini Füzuli rayonunda yerinə yetirdikdən sonra ailəsinin yanına qayıdıb. Bir müddət ailəsinə dəstək olmaq üçün müxtəlif sahələrdə işləyib. Lakin hər zaman hərbiçi olmağı arzulayıb. 2018-ci ildən Gizirlik kursunu bitirərək Dövlət Sərhəd Xidmətində işə başlayıb.
2019-cu il iyulun 15-də Türkanə xanımla ailə həyatı qurub. 2020-ci il sentyabrın 18-də ilk övladı Dəniz dünyaya gəlib. 2022-ci ilin oktyabr ayından xidmətini Daxili Qoşunların Sülhməramlı Qüvvələrində davam etdirib.
2023-cü il sentyabrın 4-ü ailəsi ilə son görüşü olub. Evdən çıxarkən hamilə yoldaşına narahat olmasın deyə xidmət üçün Qusara gedəcəyini bildirib. Lakin 
Lokal Tipli Antiterror əməliyyatlarında iştirak etmək üçün Ağdama yola düşüb. Sentyabrın 19-u baş verən əməliyyatlar zamanı öndə gedən Ramil düşmənlərlə vuruşmaqla yanaşı həm də, yaralı əsgərlərin həyatını xilas etməyə çalışıb. Hətta qolundan yaralansa da, dayanmadan irəli gedib. Əməliyyatlar bitdikdən sonra evlə əlaqə saxlayıb və yaxşı olduğunu bildirib. Lakin pusquda dayanan hiyləgər düşmən təslim bayrağını qaldırmasına baxmayaraq mənfurluğundan əl çəkməyib. Ramil yaralı döyüş yoldaşını xilas etməyə çalışarkən düşmən sinayperi ilə vurularaq şəhadətə ucalıb. Peşəkar döyüşçü olan Ramili düşmən qəfil atəşi olmasa heç vaxt yenə bilməzdi. 2024-cü il yanvarın 1-i öz ad günündə üzünü görmədiyi, lakin hələ doğulmadan adını qoyduğu Yağmur qızı dünyaya gəlib.
Bakı şəhəri II Fəxri Xiyabanda dəfn olunan Ramil Rəhimov ölümdən sonra Prezidentin sərəncamına əsasən “Vətən uğruna” medalı və 3-cü dərəcəli “Vətənə xidmətə görə” ordeni ilə təltif olunub.
Şairə xanım şəhidimizin ailəsi ilə vaxt keçirib, xatirə şəkilləri çəkdirərək onlardan ayrılıb. Qeyd edək ki, şəhid Ramil Rəhimov Esmira Günəşin "Antiterror şəhidləri" kitabında yer alıb.