Səyyar Gənclər Xidməti Masallı gənclərilə görüşüb

“İmkanlar Masallı gənclərinə doğru gəlir”

Səyyar Gənclər Xidməti bu dəfə Masallı gənclərini sevindirib.

İki aya yaxındır ki, “İmkanlar sənə doğru!” şüarı ilə yola çıxan “Səyyar Gənclər Xidməti”nin 8-ci dayanacağı bu rayon olub.

Dövlət gənclər siyasətinin gənclər üçün yaratdığı xidmət və proqramların ucqar kəndlərdə yaşayan gənclərin də əlçatanlığının artırılması, gənclər siyasəti ilə bağlı maarifləndirmə, eləcə də gənclərin sosial aktivliyinin dəstəklənməsi, asudə vaxtlarının səmərəli təşkili və onların bilik, bacarıq və dünyagörüşünün genişləndirilməsinə yönəlmiş tədbirlər təşkil etmək məqsədi daşıyan “Səyyar Gənclər Xidməti” layihəsi Masallı rayonunda beş günlük işinə başlayıb. Bu müddət ərzində gənclər müxtəlif fəaliyyətlərə cəlb olunacaq.

Masallı şəhər Sakit Tağıyev adına 4 nömrəli tam orta məktəbindəki açılış mərasimi öncəsi Dövlət Himnimiz səsləndirilib, Azərbaycanın müstəqilliyi, ərazi bütövlüyü uğrunda canından keçən şəhidlərimizin əziz xatirəsi bir dəqiqəlik sükutla yad edilib.

Mərasimdə iştirak edən Masallı Rayon İcra Hakimiyyətinin başçısı Araz Əhmədov “Səyyar Gənclər Xidməti” layihəsinin Masallıda həyata keçirilməsinin gənclərin dövlətin yaratdığı imkanlardan faydalanmasına şərait yaradacağını, onların rayonun sosial-iqtisadi inkişafında daha fəal rol oynayacağına inamını ifadə edib.

Respublika Gənclər Fondunun icraçı direktoru vəzifəsini icra edən Qədir Xəlilov bu gün Azərbaycanı dünyada layiqincə təmsil edən gənclərin inkişafı üçün bu cür layihələrin əhəmiyyətini vurğulayıb, gəncləri dövlətin onlar üçün yaratdığı fürsətlərdən yararlanmağa dəvət edib. 

Vətən Müharibəsi iştirakçısı Cavid Nuri məğrur Azərbaycan gənci timsalında 44 günlük haqq savaşında fədakarlığı ilə seçilən Masallı gənclərinin ölkənin ictimai-siyasi həyatında da fəallığını diqqətə çatdırıb.

Natiqlər layihə iştirakçılarına uğurlar arzulayıblar.

Rəsmi hissə Masallı şəhər 11 illik İncəsənət Məktəbi şagirdlərinin musiqili çıxışları ilə yekunlaşıb.

Sonra qonaqlar tədbir ərazisilə tanış olub. Ərazidə STEAM formatlı innovativ sərgi, gənclərin “Yaşıl dünya naminə həmrəylik ili”nə həsr edilmiş süni intellekt alətləri ilə yaratdıqları təsvirlər və rəsm əsərləri, virtual eynəklə virtual səyahət yer alıb.

Beş gün ərzində Masallı gənclərinə müxtəlif xidmətlər təklif olunacaq. Gənclər üçün şəxsi anketin (CV) yaradılması, gənclərin maraq dairələrinə uyğun “Gənclər siyasəti və dövlətçilik”, “Zərərli vərdişlərə yox deyək”, “Peşə seçimi və karyera” və “Sağlam və təhlükəsiz həyat” mövzularında təlim sessiyaları, robototexnika, rəsmçəkmə, 3D printer və qələm, tətbiqi şəbəkə sənəti üzrə master-klaslar bu xidmətlər arasında olacaq.

Layihədə nəzərdə tutulmuş yarış və oyun proqramları çərçivəsində gənclər arasında vətənpərvərlik mövzusunda “Xəmsə” intellektual oyunu, Azərbaycan xəritəsinin pazl lövhə üzərində qurulması yarışı, stolüstü futbol və labirint yarışı, darts oyun çempionatı, çölçü oyun yarışı, “Jenga” oyunu, kəndir dartma yarışı baş tutacaq. Yarışlarda fəallıqları ilə seçilən gənclər mükafatlandırılacaq.

Respublika Gənclər Fondu, Gənclərin İnkişaf və Karyera Mərkəzi və “Gənc Könüllülər” tərəfindən həyata keçirilən “Səyyar Gənclər Xidməti” layihəsinin bu il oktyabr ayınadək hər birində 5 gün olmaqla, 10 şəhər və rayonda, eləcə də Naxçıvan Muxtar Respublikasında ucqar kənd gənclərinə xidmət göstərməsi nəzərdə tutulur.

Akif AĞAYEV