Masallıda kənd təsərrüfatı yeni inkişaf mərhələsində

Masallı rayonunda 2023-cü ildə 903,0 hektar sahədən 15,9 ton məhsul götürülüb. Məhsuldarlıq əvvəlki illə müqayisədə 2,0 s/ha artaraq 176,0 s/ha olub.

Bu kimi məsələlərlə bağlı fikirlər Masallıda kartofçuluğun inkişaf etdirilməsi və problemlərin aradan qaldırılması ilə bağlı qarşıda duran vəzifələrə həsr olunmuş müşavirədə səslənib.

Rayon icra hakimiyyətinin başçısı Araz Əhmədovun sədrliyi ilə keçirilən müşavirədə aqrar sektora göstərilən dövlət dəstəyindən, bu sahənin inkişafı üçün inzibati və maliyyə resurslarının səfərbər edilməsinin, iri təsərrüfatların, kooperativlərin, soyuducu anbarların yaradılmasının perspektivlərindən bəhs edilib. 

Kənd təsərrüfatının yeni inkişaf mərhələsində olduğunu vurğulayan rayon rəhbəri tərəvəzçiliyin, heyvandarlığın, üzümçülüyün, çiyələkçiliyin inkişafı, çəltikçiliyin, bağçılığın, tütünçülüyün perspektivləri barədə fikirlərini bildirib, bu mərhələdə fermerlərin üzərinə mühüm vəzifələr düşdüyünü diqqətə çatdırıb

Mütəxəssislər, tabeli təşkilart rəhbərləri mülkiyyətçilərin sualları ətrafında yaranan məsələlərlə bağlı müvafiq açıqlamalar veriblər. 

Daha sonra Təklə kəndində Yadulla Vəliyevin rəhbərlik etdiyi kartof sahələrində məhsul yığımı ilə tanış olublar.

                                                                       ***

Əlavə edək ki, respublikada ipəkçiliyin inkişafı ilə bağlı həyata keçirilən tədbirlər Masallı baramaçılarının da bu sahəyə olan marağını xeyli artırıb.

Rayon rəhbərinin Çaxırlı kənd kümçüləri ilə görüşdə bildirilib ki, beş otaqda saxlanılan 4 qutu barama qurdundan 200 kiloqram barama tədarükü gözlənilir.

Məlumat verilib ki, ipəkqurdu yetişdirmək üçün əvvəlcədən lazım gələn bütün hazırlıq işləri görülüb, otaqlar istiliklə təmin edilib. Yem bazası da kifayət qədərdir.

Akif AĞAYEV