Milli Qəhrəman Polad Həşimovun doğum günündə xatirəsi yad edilir

Azərbaycan Müdafiə Nazirliyinin bir qrup zabiti və Vətən Müharibəsi iştirakçıları Milli Qəhrəman, general-mayor Polad Həşimovun doğum günündə xatirəsini ehtiramla yad ediblər.

Mərasimdə Milli Qəhrəmanın ailə üzvləri də iştirak ediblər.

Nümayəndə heyəti Müdafiə Nazirliyinin rəhbərliyi adından II Fəxri Xiyabanda Polad Həşimovun məzarını ziyarət etmiş, Milli Qəhrəmanın məzarı üzərinə gül dəstələri düzülmüşdür.

Xatırladaq ki, bu gün Azərbaycanın Milli Qəhrəmanı Polad Həşimovun anadan olmasının 50 ili tamam olur.

Polad Həşimov general-mayor rütbəsinə qədər yüksəlib. Cəbhə bölgələrində xidmət etmiş, bütün əmr və göstərişləri ləyaqətlə yerinə yetirmişdir.

Azərbaycan Prezidenti, Silahlı Qüvvələrin Ali Baş Komandanının Sərəncamı ilə 2016-cı ilin aprel döyüşləri zamanı ölkəmizin ərazi bütövlüyünün qorunmasında xüsusi xidmətlərinə və Azərbaycan Ordusuna həvalə edilmiş döyüş tapşırıqlarının yerinə yetirilməsində fərqlənməyə görə İlham Əliyev 20 aprel 2016-cı il tarixli Polad Həşimov 3-cü dərəcəli “Vətənə xidmətə görə” ordeni ilə təltif edilib. Azərbaycan Prezidenti 2019-cu il iyunun 24-də Polad Həşimova general-mayor ali hərbi rütbəsi verib.

Polad Həşimov 2020-ci il iyulun 14-də Azərbaycan-Ermənistan dövlət sərhədinin Tovuz istiqamətində düşmənin təxribatının qarşısını alarkən qəhrəmancasına həlak olub. Azərbaycan Respublikası Prezidentinin 9 dekabr 2020-ci il tarixli sərəncamı ilə ona ölümündən sonra “Azərbaycanın Milli Qəhrəmanı” fəxri adı verilib.