Yadigar Məmmədli:

100 yaşayın, professor!!!

Bir az ləngisəm də, dəyərli dostumuz, onu erkən yaşından "ağsaqqal" adlandırdığımız professor Qulu Məhərrəmli barədə düşündüklərimi qələmə almağa qərar verdim. Əslinə qalsa, bu statusu yazmağa sövq edən amil mediada, sosial şəbəkələrdə Qulu müəllimin doğum günündən başlayaraq aşıb-daşan və bu gün də davam edən coxsaylı yazılar səbəbindən oldu. Təbii ki, o yazıları təftiş etmək fikrim yoxdu... amma xeyli düşündürdü məni bu mənzərə. İlk başdan deyim ki, cəmiyyətimizin müxtəlif təbəqələrinə aid olan fərqli insanların-dostların, jurnalistlərin, gənclərin, ziyalıların və ayrı-ayrı fərdlərin ağızdolusu tərifləri, professorun xeyli nümunəvi keyfiyyətlərini dilə gətirmələri çox qürurvericidir. Ayrı-ayrı şəxslər "ağsaqqal"ın nəinki dostlarına, heç tanımadığı adamlara təmannasız köməklik göstərməsini, özəl telekanaların olmadığı dövrdə AzTV-nin canlı yayımlanan "Səhər" proqramında cəsarətli süjetlərini, televiziyada yasaq olan mövzuların və arzuedilməz şəxslərin çəkinmədən ekrana çıxarmasını təmin etməsini xüsusi qeyd edirlər. Fikrimcə, bu qeyd olunanlar olduqca vacib keyfiyyətlərdir. Amma mənim düşüncəmə görə, bütün tərəflərin yalnız müsbət qiymətləndirdiyi professor Qulu Məhərrəmlinin belə yüksək qiymət alması yalnız bu sadalananlarla bağlı deyil, həm də daha fərqli xarakter keyfiyyətinə görədir. Bəs nədir? Fikrimcə, bu Qulu müəllimin sərgilədiyi ictimai əxlaqı ilə bağlıdır. Və mən təəssüflə deməliyəm ki, indiki dönəmdə ən qıt keyfiyyət ictimai əxlaqla bağlıdır. Peşəkarlığına görə zəmanəmizdə həm jurnalistlər, həm də dilçilər arasında ustad kimi dəyərləndirilən professor cəmiyyətimizin az qala bütün əhəmiyyətli məsələlərində ictimai mövqe nümayiş etdirir. Bəli, konkret mövqe. Bilirik, birmənalı mövqenin nümayiş etdirilməsi vacibdir, lakin boynumuza alaq, lap az adam bunu edə bilir, təəssüf ki. Biz Qulu müəllimi jurnalistikanın bütün zamanlarda dəyişməyəcək təməl prinsiplərinin tətbiqi və təbliğində, dilimizin qorunması ilə bağlı müxtəlif müzakirələrdə, fərqli müstəvilərdə necə eyni mövqedən çıxış etməsinin şahidiyik. Təbii ki, diqqət yetirənlər şahiddir. Yoxsa, təkcə bütün fəaliyyətində peşəkar olması, əksər tədbirlərə vaxt taparaq iştirak etməsi və hər kəsin köməyinə yetməsinə çalışması, fikrimcə çevrəsində olmayan insanlar da daxil belə bir sevginin qazanılmasına yetməzdi.

Hörmətli və dəyərli Qulu müəllim.

Mən yubileyin qeyd olunduğu ziyafətdə də qeyd etdiyim kimi, siz ətrafınızda olan bir xeyli dost üçün flaqman rolunu oynayırsınız. Həyatın və yaradıcılığın bir çox parametrlərində öndə getdiyinizə görə, bizlər baxıb ürəklənir və fərəh hissi keçiririk. Sizi hər zaman belə şux, gülərüz, "ağsaqqal" olmağınıza rəğmən gənc və sağlam qalmağınızı diləyirəm. 100 yaşayın, professor!!!