Cavadxan Qasımov:

SABAH qruplarının yaradılması NDU-da təcrübəli mütəxəssislərin hazırlanmasında əhəmiyyətli addım olmaqdadır

Azərbaycan Respublikasının Prezidenti tərəfindən "Ali təhsildə yeni məzmunlu təhsil proqramlarının əhatə dairəsinin genişləndirilməsi və maliyyələşdirilməsi barədə" 15 noyabr 2024-cü il tarixli Sərəncamı Ali təhsilin yeni keyfiyyət mərhələsində inkişafı və perspektivliliyinin daha da yüksəldilməsi sahəsində mühüm bir tənzimləmə olacaq.

Sərəncama əsasən, 2022-ci il 22 iyul tarixli 3378 nömrəli Sərəncamı ilə təsdiq edilmiş “Azərbaycan Respublikasının 2022‒2026-cı illərdə sosial-iqtisadi inkişaf Strategiyası”nda ali təhsil sisteminin məzmun və keyfiyyət göstəricilərinin müasirləşməsi məqsədilə ali təhsildə tətbiq olunan yeni məzmunlu proqramların əhatə dairəsinin və keyfiyyətinin artırılması üçün tədbirlərin həyata keçirilməsi nəzərdə tutulmuşdur.

Tarixi Sərəncamda:

- SABAH proqramının əhatə dairəsi 2025‒2026-cı tədris ilindən başlayaraq mərhələlərlə 2028-ci ilədək genişləndirilməsi;

- SABAH proqramı ilə təhsil alan tələbələrin təhsil xərclərinin maliyyələşdirilməsi müvafiq illərin dövlət büdcəsində Azərbaycan Respublikasının Elm və Təhsil Nazirliyi üçün nəzərdə tutulmuş məqsədli vəsaitlər hesabına təmin olunması kimi məsələlər öz əksini tapmışdır.

Eyni zamanda, Sərəncamda, bununla bağlı olaraq, Azərbaycan Respublikasının Nazirlər Kabineti ilə Elm və Təhsil Nazirliyinə də tapşırıqlar verilmişdir.

Bildirmək olar ki, Qalib ölkənin inkişaf edən ali məktəbi Naxçıvan Dövlət Universitetinin bu sahədəki tədbirləri təqdirəlayiqdir. Belə ki, 2023-2027-ci illəri əhatə edən Naxçıvan Muxtar Respublikasının sosial-iqtisadi inkişafına dair Dövlət Proqramında bir çox zəruri tədbirlərlə yanaşı, məhz ali məktəbimizdə SABAH qruplarının yaradılması məsələləri də nəzərə alınmışdır.

Dövlət proqramının 9-cu prioritetində Naxçıvan Dövət Universitetinin mövcud potensialı əsasında qarşıdakı mərhələlər üzrə yeni hədəflərinin müəyyən olunması ilə daha mütərəqqi tədbirlər nəzərdə tutulmuşdur. Belə ki, bu məqsədlə də, Naxçıvan Muxtar Respublikasında daha dinamik ali təhsilin keyfiyyətinin yüksəldilməsinin zəruriliyinə nəzər salınmış və burada Naxçıvan Dövlət Universitetinin önəminə diqqət çəkilmişdir. Təsbit olunur ki, universitetimiz ilə digər ölkələrin ali təhsil müəssisələri arasında əməkdaşlıq gücləndirilməsi təmin olunmaqla, birgə proqramların təşkil olunması diqqətdə saxlanılmalı, eyni zamanda, ali təhsil müəssisələrində yeni məzmunlu proqramların tətbiqi üzrə layihələrin həyata keçirilməsi olduqca aktual hesab olunmuşdur. Qeyd etmək olar ki, həmin layihələr içərisində, SABAH qruplarının, ingilisdilli tibb fakültəsi, tibbi tədqiqat klinikası yaradılması və s. kimi tədbirlər prioritet hesab olunmaqdadır.

SABAH qruplarının yaradılması, artıq Naxçıvan Dövlət Universitetinin gənclərin ixtisaslaşması, təcrübəli mütəxəssislərin hazırlanması və ölkəmizin milli təhsilinin daha mütərəqqi inkişaf etdirilməsi sahəsində əhəmiyyətli addım olmaqdadır. Belə ki, Dövlət Proqramının icrası ilə əlaqədar olaraq ölkəmizdə ilk dəfə olaraq, məhz Naxçıvan Dövlət Universitetində 2024-2025-ci tədris ilindən etibarən Tibb ixtisası üzrə SABAH qrupları fəaliyyətə başlayıb.

Dövlət Proqramı əsasında istifadəyə verilməsi nəzərdə tutulan yüksək standartlara cavab verəcək Tibb kampusu SABAH qruplarının tələblərinə uyğun, peşəkar tibb kadrlarının hazırlanmasına öz töhfəsini verəcək. SABAH qruplarında tədris proseslərinin təşkili xüsusi tədris planı əsasında həyata keçirilmiş olacaq. Belə ki, dünyanın nüfuzlu, tibb sahəsi üzrə qabaqcıl universitetləri ilə əməkdaşlıq müqavilələri əsasında təcrübəli həkimlərin tədris proseslərində iştirakı nəzərdə tutulur, eyni zamanda, tələbələrin digər ölkələrin universitet və klinikalarında təcrübələri təşkil olunacaq.

Beləliklə, Dövlət Başçımızın imzalamış olduğu müvafiq Sərəncam, SABAH qruplarının yaradılması, fəaliyyətinin təşkili və idarə olunması ilə bağlı olan tədbirlərin həyata keçirilməsində ali məktəblərin, xüsusilə də, Naxçıvan Dövlət Universitetinin bu sahədəki proseslərinə də həm işıq salacaq, həm ona dayaq olacaq, həm də hərəkətverici təsir göstərmiş olacaq.

Xeyirli olsun.