Orta Dəhlizin rəqəmsallaşdırılması COP29-da müzakirə olunacaq

COP29-da Urbanizasiya, Turizm və Nəqliyyat Günü çərçivəsində “Davamlı Rəqəmsal Orta Dəhliz və onun hüdudlarından kənarda” mövzusunda nazirlər səviyyəsində dəyirmi masa keçiriləcək.

Bu barədə Rəqəmsal İnkişaf və Nəqliyyat Nazirliyi məlumat yayıb.

Dəyirmi masada son inkişaflar, eləcə də Orta Dəhliz və digər nəqliyyat marşrutlarının davamlılığını və rəqəmsallaşdırılmasını təşviq etmək üçün qarşıdan gələn təşəbbüslər müzakirə olunacaq.

Tədbirdə region və ondan kənar ölkələrin nazirləri və qurum rəhbərləri iştirak edəcəklər.

Dəyirmi masa zamanı yaşıl, dayanıqlı nəqliyyat infrastrukturunun inkişafı ilə bağlı uğurlu təcrübələr, enerji səmərəliliyinin artırılması və əməliyyat kommunikasiyalarının təkmilləşdirilməsi üçün rəqəmsallaşma və intellektual nəqliyyat sistemlərindən istifadə nümunələri müzakirə olunacaq.

Həmçinin yükdaşımalar zamanı karbon qazı emissiyalarının azaldılmasında innovativ texnologiyaların rolu, dayanıqlı nəqliyyat əlaqələrinin təmin edilməsində avtomatlaşdırma və süni intellektin potensial rolu barədə fikir mübadiləsi aparılacaq. Tədbirin yekununda regionda davamlı inkişaf və rəqəmsal transformasiya sahəsində irəliləyişlərə nail olmaq üçün kollektiv öhdəliyi əks etdirən kommunikenin qəbul edilməsi planlaşdırılır.