Rasim İsmayılov: 

Həmin döyüşçülər indi həmin emosiya ilə danışa bilərmi?

Son 3 gündə Zəfər Günü ilə bağlı TV-lər ilə xeyli videomaterial verdi efirə. Kimi hazırladığını, kimi də əlinə keçəni və oğurladığını. İnsafən, ən səliqəli və adekvat efir İTV-də oldu. Çünki, 3 il əvvəl, elə müharibə getdiyi dövrdə "Azərbaycanfilm"ə direktor təyin edilən Fariz Əhmədov 8 noyabr zəfərinin ardınca "Görünməyən qəhrəmanlar" silsilə sənədli filmlər ideyasını ortaya qoydu və həyata keçirməyə başladı. Əvvəlcə 5 film həddində nəzərdə tutulan filmlərin sayı indi 12-dir. Kinostudiyanın imkanlarını nəzərə alsaq filmlərin istehsalı üçün maddi olmasa da dəstəyə ehtiyac vardı. O vaxt məhz İTV, Balaş Qasımov irəli çıxdı. Onda heç kim 3-5 il sonranın efirini düşünmürdü. Sadəcə, emosiyalar sönməmiş, Qarabağda quruculuq işləri başlamamış real görüntüləri, hissləri yaddaşa köçürməyi düşünürdü. (Məhz bu amillər illər keçsə də öz efir keyfiyyətini, tamaşaçı sevgisini saxlayacaq və baxılacaq. Necə ki, 4 il ərzində öz maraq dairəsini itirməyib.) Demirəm Hollivud standartı idi. Amma həmin kadrları, həmin emosiyaları bu gün əldə etmək mümkündürmü? Xeyr. Bu kadrların qiyməti varmı? Xeyr. Təzədən quraşdırıb çəkmək mümkündürmü? Xeyr. Həmin döyüşçülər indi həmin emosiya ilə danışa bilərmi? Xeyr. Bu sual-cavab siyahısını uzatmaq olar. Bir neçə il keçəndən sonra dəyərini daha dəqiq biləcəyik. Hansı ki, birinci Qarabağ Müharibəsində belə sistemli çəkilişlərin olmaması necə böyük problem olduğu hamımıza aydındır. Amma illər keçir işə ləyaqətli və peşəkar yanaşma öz bəhrəsini İTV-nin efirində verir. (Bi filmlərin TV eksklüziv yayım hüquqları İTV-dədir.) Bəli, deyə bilərsiniz yeni verilişlər, filmlər çəkmək olmazmı? Olar. Və çəkilir də. Amma 2020-ci ilin effektini almaq mümkündürmü? Məncə, yox.

Vətən Müharibəsinin salnaməsi olan "Görünməyən qəhrəmanlar" silisləsində olan sənədli filmlər:

"27 sentyabr",

"Böyük əmr",

"Dövlət Təhlükəsizliyi Xidməti",

Dövlət xətti",

"Dəniz pişikləri",

"Hərbi həkimlər",

"Ağxalatlılar",

"İstehkam"

"Hərbi Hava Qüvvələri",

"Təminat",

"Bizim torpaq",

"Şərəf yolu".

P.S. Oğurluqlardan isə heç danışmayaq. Məsələn, "Şuşa, sən azadsan!" sənədli filminin də TV yayım hüquqları da İTV-də olmasına baxmayaraq əksər kadrlar bəzi televiziyaların efirini bəzəyir. Peşə etikasına əməl etmək bir yana, hətta filmin adını belə qeyd etmirlər. İnsaf dinin yarısıdır. Bu filmlər elə də asan başa gəlməyib. Minalı ərazilərdə, qışın şaxtasında, yayın adamöldürən istisində çəkilən əziyyətə, əməyə hörmətlə yanaşmaq lazımdır. Onu da qeyd edim ki, bu filmlərin istehsalı o qədər də böyük olmayan büdcə və heyətlə həyata keçirilib. Bəzən gərginlikdən, 24 saatlıq iş rejimindən yorulanda Farizə hirslənmişik, gileylənmişik, deyinmişik. Amma axırda hamı öz işinin qulpundan yapışıb başa çatdırıb. Efirdə izləyəndə necə gözəl bir iş gördüyümüzə sevinmişik. Bu filmlərin istehsalında iştirak edən entuziast dostları salamlayıram.