Ayşə İsazadə: 

Sonuncu stansiyanızda yeriniz behişt, ruhunuz şad olsun, Tağı müəllim!

Tağı müəllimdən eksklüziv müsahibə almağa getmişdim. Çəkilişdən əvvəl dedi ki, gəl, otur, çay içək, görüm, kimsən, nəçisən, sonra başlayaq müsahibəyə. Bütün tərcümeyi-halımı soruşdu, maraqlandı. Ondan sonra başladı özündən, işindən və başqa bir neçə məsələdən danışmağa. Söhbətin yekununda qayıtdı ki, sən axı demədin haralısan. Gülə-gülə naxçıvanlı olduğumu bildirdim.

- Sən necə naxçıvanlısan, bizim ləhcədə danışmırsan?!

- Mən jurnalistəm, televiziyada işləyirəm, həm də burada doğulub-böyümüşəm, Tağı müəllim.

- Səni lap çox istədim, özümünküsən, gəl bu şəkli çəkdirək deyib məni bağrına basdı.

Sonra başladıq çəkilişə. Müsahibə bitəndə konvert uzatdı mənə. İmtina etdim. Dəfələrlə israr etdi, qətiyyətlə yox dedim.

-Azdır? Bir bax da içinə. Əziyyət çəkmisən, götür, inad etmə. Ay qızım, burada nə var?

- Tağı müəllim, mən əziyyətimə görə maaş alıram və bu, mənim işimdir. Əsla olmaz. Bunu mənim özümə və peşəmə hörmətsizlik kimi qəbul edirəm. Xahiş edirəm, bu məsələdə israr etməyin.

Başını yelləyərək güldü.

- İndi sənin kimi jurnalist azdır, ay dəli naxçıvanlı. Məni dirəyib pul alır e bəziləri…

Nə isə, uzun söhbətdən sonra sağollaşıb ayrıldıq məkandan. Üstündən bir müddət sonra Tağı müəllim YAP- da bizim otağa gəldi. Verilişimdə qonaq idi. Çay istədi, həmin anda konfetim olmadığı üçün qəndlə ona çay verdim efirdən öncə. Utana-utana dedim ki, bağışlayın konfetim yoxdur)). Tərslikdən həmişə çantamda olan da bitmişdi.

Veriliş bitəndə studiyanın kənarında, ona çay verdiyim yerdə nəlbəkinin altında 100 manat pul gördüm. Tez zəng elədim, hirslə dedim incidim sizdən. Bu nədir? Axı biz belə danışmamışdıq. Dedi sənə vermirəm, amma otağa ( özünə məxsus ləhcəsilə) “düzəmməli” konfet al. Mən qəndlə çay içə bilmirəm))) dedi və güldük. Dediyi kimi də etdim…

Bəlkə, uzun oldu. Amma yazmaq istədim… Xatirəniz əzizdir. Jurnalistlərin əksəriyyətinin sizinlə bağlı acılı-şirinli xatirələri var.

Bu da bizim şirin xatirəmiz kimi yazıldı…Xəstəliyinizi biləndə üzülmüşdüm, çox əziyyət çəkdiyinizi eşitmişdim…

Sonuncu stansiyanızda yeriniz behişt, ruhunuz şad olsun, Tağı müəllim! Allah doğmalarınıza səbir versin!