"Google" öz süni intellekt məlumat mərkəzlərini nüvə reaktorları ilə gücləndirmək niyyətindədir

Google enerjiyə ehtiyacı olan məlumat mərkəzlərini aşağı karbonlu elektriklə təmin etmək üçün Kairos Power startapından altı-yeddi kiçik modul nüvə reaktoru (SMR) sifariş edib. 

Google və Kairos bildiriblər ki, texnologiya şirkəti ümumi gücü 500 MVt olan SMR-lər üçün sifariş verib ki, bu da Kairosun 2030-cu ilə qədər ilk kommersiya reaktorunu və 2035-ci ilə qədər əlavə reaktorları işə salmağa imkan verəcək.

Şirkətin enerji və iqlim üzrə baş direktoru Maykl Terrellin sözlərinə görə, saziş "Google"un “təmiz enerjiyə doğru 15 illik səyahətimizdə mühüm mərhələni” qeyd edir. Reaktorların şəbəkə ilə təchiz ediləcəyi, yoxsa birbaşa məlumat mərkəzlərinə qoşulacağı ilə bağlı suala isə Terrell bildirib ki, Google bütün variantları nəzərdən keçirir.

Hər iki şirkət müqavilənin dəyəri və ya "Google"un SMR reaktorlarının tikintisini qabaqcadan maliyyələşdirəcəyi və ya onlar tikildikdən sonra elektrik enerjisi üçün pul ödəyəcəyi barədə şərh verməkdən imtina etdi. Google-Kairos sövdələşməsi texnologiya şirkətinin atom elektrik stansiyasını onlayn vəziyyətə gətirməyə kömək etdiyi ilk müqavilədir. Son 20 ildə ABŞ-də cəmi üç reaktor istismara verilib.

İri miqyaslı nüvə stansiyaları ilə müqayisədə, SMR reaktorları "sadələşdirilmiş, mahiyyət etibarilə təhlükəsiz dizayn, daha sürətli tikinti və sahənin çevikliyi" təklif edir, - Terrell bildirib.

Kaliforniyanın Alameda şəhərində yerləşən “Kairos” şirkəti su ilə deyil, ərimiş flüorid duzu ilə soyudulan reaktor hazırlayıb. Dekabr ayında şirkət Tennessidə Hermes adlı 50 meqavatlıq nümayiş reaktoru tikmək üçün ABŞ Nüvə Tənzimləmə Komissiyasından icazə aldı. Bu, son yarım əsrdə ABŞ-də yeni tipli reaktorun tikintisi üçün ilk təsdiq idi. ABŞ Energetika Nazirliyi Qabaqcıl Reaktorun nümayişi proqramının bir hissəsi olaraq Hermes layihəsinə təxminən 300 milyon dollar sərmayə qoyur. Şirkət Hermes-in tikintisinə iyul ayında başlayıb və onu 2027-ci ilə qədər istismara verməyi planlaşdırır. Sentyabrda şirkət Nyu-Meksiko ştatının Albukerke şəhərində duz zavodu və iki yanacaq laboratoriyası tikəcəyini bildirib.