Masallıda Müəllimlər Günü münasibətilə tədbir keçirilib

Masallı rayonunda 5 oktyabr – Beynəlxalq Müəllimlər Günü münasibətilə tədbir keçirilib.

Tədbirdə Lənkəran-Astara Regional Təhsil İdarəsinin Masallı rayonu üzrə sektorunun rəhbərlik və əməkdaşları, rayon icra hakimiyyətinin məsul işçiləri, təhsil müəssisələrinin rəhbərləri, şəhid valideynləri, ağsaqqal və ziyalılar iştirak ediblər.

İştirakçılar əvvəlcə Ümumilli Lider Heydər Əliyevin abidəsini ziyarət edib, xatirəsini ehtiramla anıblar. 

Müəllimləri peşə bayramları münasibətilə təbrik edən Masallı rayonu üzrə təhsil sektorunun müdiri Elman Rzayev çıxışı zamanı bildirib ki, təhsil işçilərinin əməkhaqqının artırılması, onların mükafatlandırılması, fəxri adlarla təltif edilməsi, sosial müdafiələrinin gücləndirilməsi istiqamətində görülən işlər Azərbaycanda bu sahənin inkişafına yönəlmiş dövlət siyasətinin əsas istiqamətlərindəndir. 

Masallı Rayon İcra Hakimiyyətinin İctimai-siyasi və humanitar məsələlər şöbəsinin müdir müavini Abbas Abbaszadə, Azərbaycan Təhsil İşçiləri Azad Həmkarlar İttifaqının (ATİAHİ) Masallı rayonu üzrə komitə sədri Səfail Eyvazov və digərləri müəllimləri təbrik edib, onlara çətin və şərəfli işlərində uğurlar arzulayıblar.

Bir qrup qabaqcıl müəllimə rayon təhsil sektoru, ATİAHİ-nın rayon komitəsi və “Masallı Ziyalıları” ictimai birliyinin fəxri fərmanları təqdim olunub.

Akif AĞAYEV