Kərim Kərimli:

Minlərlə insana mənəvi həyat vermiş müəllimlər heç zaman ölmür...

Bizim ailədədə də üç müəllim var.

Mənim, müəllim sarıdan bəxtim gətirib. Gözümü bu dünyaya açandan o qədər yaxşı müəllimim olub ki, adlarını sadalasam uzun bir siyahı alınar.

Həm ailəmizdə, həm orta və ali məktəbdə, həm də, ümumiyyətlə, həyatda...

Artıq dünyasını dəyişmiş bütün əziz müəllimlərimi böyük hörmət və ehtiramla yad edir, onlara əbədi mənzillərində rahatlıq arzulayıram.

İnanıram ki, yüzlərlə, minlərlə insana mənəvi həyat vermiş müəllimlər heç zaman ölmür, daha doğrusu, ölməzlik qazanır və bizimlə, bizdən əvvəlki və sonrakı nəsillərlə mənəvi ömürlərini davam etdirirlər.

Yaxşı olmayan müəllimlər də tanımışam, həyat yollarında rastıma çıxıb. Ancaq "pis" sözü "müəllim"ə yaraşmadığına görə onlar haqqında danışmaq istəmirəm...)

Hazırda sağ olan müəllimlərimi və ölkəmizin mənim şəxsən tanımadığım bütün yaxşı müəllimlərini də bu günkü bayram münasibətilə təbrik edirəm.

İndi mənim gözlərimdə dünyanın fəaliyyətdə olan ən gözəl məktəbi Şuşa şəhər 1 nömrəli tam orta məktəbidir.

Məktəb doğrudan da bütün parametrlərinə görə Azərbaycanın ən yaxşı, ən gözəl məktəbidir.

Məktəbin yorulmaz direktoru Səbinə Gözəlova xanım başda olmaqla bütün müəllimlərini, yeni Şuşada yenicə fəaliyyətə başlamış gözəl insanları sabahkı bayram - Şuşada keçirdikləri ilk Müəllim günü münasibətilə ürəkdən təbrik edirəm.

Onların hamısına uzun ömür, möhkəm can sağlığı, çətin işlərində böyük uğurlar arzulayıram.

Şuşa təhsil ənənələri ilə respublikamızın öndə gedən rayonlarından, bölgələrindən, şəhərlərindən olub həmişə. İnanıram ki, bu ənənə Səbinə xanımın rəhbərliyi və nmüəllim kollektivinin səyləri ilə daha da genişlənəcək, möhkəmlənəcək, irəliləyəcək və Azad Şuşamız təhsil sahəsində də həmişə birinci olacaq, gələcəyin gözəl mütəxəssislərinin, yaxşı insanlarının, vicdanlı vətəndaşlarının yetişməsində təməl vəzifəsini uğurla yerinə yetirəcək!

Bir daha bayramınızı təbrik edirəm, əziz müəllimlər!!!