Ağcabədidə Bilik Günü qeyd olunub

Respublikanın bütün tədris ocaqlarında olduğu kimi Ağcabədi rayon məktəblərində də “15 Sentyabr – Bilik Günü” qeyd olunub. Sentyabrın 16-da Camal İbrahimov adına Ağcabədi şəhər 8 saylı tam orta məktəbdə də “Bilik günü” özünəməxsus şəkildə keçirilib. 

Tədbirdə Ağcabədi Rayon İcra Hakimiyyətinin başçısı Rafil Hüseynov, icra hakimiyyəti başçısı aparatının məsul şəxsləri, Qarabağ Regional Təhsil İdarəsi Ağcabədi rayon Təhsil sektorunun rəhbərliyi, məktəbin direktoru, müəllim və şagird kollektivləri, eləcə də valideynlər və media nümayəndələri iştirak ediblər. 

Öncə musiqimizin tacı hesab olunan Azərbaycan Respublikasının Dövlət Himni səsləndirilib, Ulu öndər Heydər Əliyevin, eləcə də torpaqlarımızın ərazi bütövlüyü uğrunda canından keçən Vətən şəhidlərinin xatirəsi bir dəqiqəlik sükutla yad olunub. 

Çıxış edən məktəbin direktoru Anar Qasımov qonaqları salamladıqdan sonra məktəbliləri yeni tədris ili münasibətilə təbrik edib. Anar Qasımov evi zamanda rəhbərlik etdiyi məktəbin  builki uğurlarından da danışıb. Qeyd olunub ki, təkcə bu il 19 şagird qəbul imtahanlarında yüksək nəticə göstərərək respublikanın ali məktəblərinə daxil olaraq tələbə adını qazanıblar.

Ağcabədi Rayon İcra Hakimiyyətinin başçısı Rafil Hüseynov məktəbə ilk qədəmlərini qoyan körpə fidanları, birinciləri və onların valideynlərini təbrik edərək onlara təhsil uğurları arzulayıb. O da vurğulanıb ki, 8 saylı tam orta məktəb öz peqadoji fəaliyyəti, müəllim kontingeti ilə fərqlənən məktəblərimizdən biridir. 

Çıxış edən məktəbin müəllimləri və valideynlər də əlamətdar gün münasibətilə tədbir iştirakçıları ilə öz ürək sözlərini bölüşüblər, bu gün şagird adını qazanan bütün uşaqları təbrik ediblər. 

Bundan sonra məktəbin şagirdləri rəqslər nümayiş etdiriblər, şeirlər söyləyiblər. 

Nəhayət, ilk zəng vurulub. Birincilər məktəbə, sinif otaqlarına ilk qədəmlərini qoyublar. Rayon rəhbəri birincilər üçün nəzərdə tutulan sinif otaqları ilə yaxından tanış olub, məktəbin direktoruna və müəllim heyətinə tövsiyələr verib. 

Biz də öz növbəmizdə sizləri “15  Sentyabr – Bilik Günü” münasibətilə təbrik edir, hər birinizə sağlam, xoşbəxt həyat, bol təhsil uğurları arzu edirik. Vətənimiz Azərbaycan sizinlə güclüdür, əziz balalar  Yeni dərs iliniz mübarək olsun!

Mais İbrahimov